ევროპარლამენტარი და ევრონესტის თავმჯდომარე, ანდრიუს კუბილიუსი საქართველოში 31 ოქტომბერს გამართულ არჩევნებთან დაკავშირებით დაშინების, მოსყიდვისა და ძალადობის დაუსჯელობის ცნობების გამო შეშფოთებას გამოთქვამს. ინტერპრესნიუსთან საუბარში ის აღნიშნავს, რომ თბილისში ევროკავშირის დელეგაციისგან დამატებით ინფორმაციებს ელოდება.

მისივე თქმით, რეფორმებისა და ევროპული ინტეგრაციის მიმართ ერთგულების დადასტურების მხრივ, ეს არჩევნები საქართველოსთვის ცენტრალური მნიშვნელობისაა.

ეუთოს დემოკრატიული ინსტიტუტებისა და ადამიანის უფლებების ოფისის (ოდირის) და ეუთოს, ევროპის საბჭოს და ნატოს საპარლამენტო ასამბლეათა საერთაშორისო დამკვირვებლების წინასწარი მიგნებებისა და დასკვნების შესახებ ერთობლივი მოხსენების თანახმად, არჩევნები კონკურენტულ გარემოში ჩატარდა და საერთო ჯამში, ფუნდამენტური თავისუფლებები დაცული იყო.

ამ წუთებში რუსთაველის გამზირზე ოპოზიცია საპროტესტო აქციას მართავს. ცესკოს გამოცხადებულ შედეგებს შედეგებს ოპოზიცია არ აღიარებს. პარტიების ნაწილი ამბობს, რომ სადეპუტატო მანდატებზე უარს იტყვიან, რათა რიგგარეშე არჩევნები ჩატარდეს.

საპარლამენტო არჩევნები საქართველოში გუშინ, 31 ოქტომბერს ჩატარდა. პარლამენტის არჩევნები წელს პირველად პროპორციულთან მიახლოებული, 120/30-ზე სისტემით გაიმართა.