საქართველოს ყოფილი პრეზიდენტი და ერთიანი ნაციონალური მოძრაობის ლიდერი, მიხეილ სააკაშვილი აცხადებს, რომ პრემიერმინისტრის თანამდებობა არ აინტერესებს. ამის შესახებ მან მთავარი არხის ეგზიტპოლების შემდეგ, ამავე არხის ეთერში ისაუბრა.

"ნაციონალურმა მოძრაობამ მოიპოვა ორჯერ მეტი ხმები, ვიდრე ყველა სხვა ოპოზიციურმა პარტიამ ერთად აღებულმა, მაგრამ ახლა მნიშვნელობა არ აქვს ხმების და ზომა-წონის გაზომვას. ახლა მნიშვნელობა აქვს ჩვენს ქვეყანას. მე საერთოდ არ მაინტერესებს ასეთი თანამდებობა, უკრაინის პრემიერმინისტრობაზე ვთქვი სამჯერ უარი. ახლა ღიად შემიძლია ვთქვა, რომ საქართველოში არ მაინტერესებს არც პრემიერმინისტრის თანამდებობა", — თქვა სააკაშვილმა.

გარდა ამისა, მისი აზრით, უნდა ჩამოყალიბდეს "ეროვნული ერთიანობის მთავრობა" და იქ კონსენსუსური ფიგურები უნდა იყვნენ.

"ამ პირობებში ჩვენი მთავარი ამოცანა არის ჩამოვაყალიბოთ ეროვნული ერთიანობის მთავრობა. მე ვაცხადებ, მიხეილ სააკაშვილი, რომ არ მივისწრაფვი არც ერთი თანამდებობისკენ ამ მთავრობაში, საერთოდ არ მაინტერესებს ჩემი არც ერთი თანამდებობა. ჩვენ უნდა ვიპოვოთ კონსენსუსური ფიგურები და მოვახერხოთ ეროვნული ერთიანობის მთავრობის ჩამოყალიბება", — თქვა სააკაშვილმა.

8 საათზე ცნობილი გახდა მთავარი არხის ეგზიტპოლის შედეგები, რომლის მიხედვითაც ენმ-სა და ძალა ერთობაშიას 33% აქვთ, ქართულ ოცნებას კი — 41%.

სხვა შედეგები ასეთია:

  • ევროპული საქართველო — 5%
  • ლელო — 4%
  • პატრიოტთა ალიანსი — 3%
  • სტრატეგია აღმაშენებელი — 3%
  • გირჩი — 3%
  • ალეკო ელისაშვილი და მოქალაქეები — 1%
  • ერთიანი საქართველო - დემოკრატიული მოძრაობა — 1%

მთავარმა არხმა ეგზიტპოლები ფრანგულ IPSOS-ს დაუკვეთა.

ეგზიტპოლების შესახებ

არჩევნების დღეს ეგზიტპოლები დამოუკიდებელმა ორგანიზაციებმა, მედიებმა და ISFED-მა ჩაატარეს. მათი შედეგები 8 საათზე გავრცელდა.

  • წელს არჩევნებზე ეგზიტპოლს ამერიკულ კომპანია Edison Research ტელეკომპანია ფორმულას დაკვეთით ატარებს.
  • მთავარი არხისთვის ეგზიტპოლებს ატარებს ფრანგული კომპანია IPSOS.
  • რუსთავი 2-სთვის ეგზიტპოლებს ბრიტანული კვლევითი კომპანია Survation ატარებს.
  • ტელეკომპანია იმედის დაკვეთით კი ეგზიტპოლებს ამერიკული კომპანია Public Opinion Strategies ატარებს.

არჩევნების დღეს ხმებს პარალელურად ითვლის არასამთავრობო ორგანიზაცია სამართლიანი არჩევნებისა და დემოკრატიის საერთაშორისო საზოგადოებაც (ISFED).

ედისონს საქართველოში სხვადასხვა დროს აქვს ეგზიტპოლი ჩატარებული. იუსტიციის სამინისტროს მიერ გამოქვეყნებული ინფორმაციით, IPSOS 2019 წელს ატარებდა კვლევას საქართველოში სასამართლო რეფორმების შესაფასებლად. Survation და Public Opinion Strategies კი საქართველოში ეგზიტპოლებს პირველად ატარებენ.