ნიკოლ კიდმანი, რომელიც ახალი ფილმის პრემიერაზე ლონდონში იმყოფებოდა, სტუმრად BBC-ის ეწვია და ჟურნალისტ ვიქტორია დებრიშაირთან პირად ცხოვრებასა და პოლიტიკაზე ისაუბრა.

კიდმანი, რომელიც ოთხი შვილის დედაა ამბობს, რომ კიდევ სურს შვილები, თუმცა მისი მეუღლე მომღერალი კიტ ურბანი ჯერჯერობით მის შემართებას არ იზიარებს.

"სიამოვნებით მეყოლებოდა კიდევ ორი ან სამი შვილი, რადგან ვგიჟდები, მართლა ვგიჟდები ბავშვების გაზრდაზე. მიყვარს, როცა ვუყურებ, როგორ თამაშობენ, მისვამენ კითხვებს და სწავლობენ. თუმცა კიტი [ნიკოლის ქმარი] ამ ამბით დიდად მოხიბლული არ არის და ამბობს, რომ დროა, არსებულ სიტუაციაზე ვფოკუსირდეთ", - ამბობს 49 წლის ნიკოლ კიდმანი.

ჟურნალისტმა კიდმანს კითხვა დონალდ ტრამპის შესახებაც დაუსვა, ნიკოლმა კი უპასუხა, რომ ახლა ტრამპის მხარდაჭერის დროა.

"ყოველთვის ვცდილობ, პოლიტიკაზე საუბარს თავი ავარიდო. არასდროს გამიკეთებია განცხადებები ამ თემაზე არც ამერიკაში და არც ავსტრალიაში [ნიკოლ კიდმანს ორმაგი მოქალაქეობა აქვს]. მე, რა თქმა უნდა, ვიცავდი, ვიცავ და ყოველთვის დავიცავ ქალთა უფლებებს, ადამიანის უფლებებს, თუმცა ვხედავთ რომ ტრამპი უკვე არჩეულია და ახლა ჩვენ, როგორც ქვეყანა, ვალდებული ვართ მხარი დავუჭიროთ იმას, ვინც ქვეყნის პრეზიდენტია. ამერიკის ძალაც სწორედ ამ მხარდაჭერაზეა დაფუძნებული", - ამბობს ნიკოლ კიდმანი.