შინაგან საქმეთა სამინისტრომ ოპოზიციის მიმართ ქართული ოცნების აღმასრულებელი მდივნის, ირაკლი კობახიძის ბრალდების შესწავლა დაიწყო. კერძოდ, უწყებაში ამბობენ, რომ ჩაატარებენ გამოკითხვებს იმის დასადგენად, იგეგმება თუ არა პროვოკაციები ოპოზიციის მხრიდან

"30 ოქტომბერს, ქართული ოცნება — დემოკრატიული საქართველოს აღმასრულებელი მდივნის მიერ გაკეთებული განცხადების საფუძველზე, რომელიც ეხება არჩევნების პერიოდში გარკვეული ოპოზიციური ძალების მიერ პროვოკაციების მოწყობას, ასევე, საჯაროდ დასახელებულ კონკრეტულ პირებს, შინაგან საქმეთა სამინისტრომ ფაქტების შესწავლა დაიწყო. ჩატარდება ყველა საჭირო ღონისძიება, მათ შორის გამოკითხვები", — წერია უწყების განცხადებაში.

მათი თქმით, პოლიცია არ დაუშვებს საარჩევნო პროცესის ძალადობივი სცენარით განვითარებას და მკაცრ რეაგირებას მოახდენს სამართალდარღვევის ნებისმიერი ფაქტზე.

დღეს, 30 ოქტომბერს კობახიძემ განაცხადა, რომ ოპოზიციას წინასაარჩევნოდ ხელკეტებითა აღჭურვილი ეკიპაჟები ჰყავს მობილიზებული. მან კონკრეტული ოლქებიც დაასახელა, სადაც, მისი თქმით, "პროვოკაციები ყველაზე მეტად მოსალოდნელია".

"პროვოკაციები ყველაზე მეტად მოსალოდნელია ბოლნისში, დმანისში, მარნეულში, ბათუმში, ზუგდიდსა და გლდანში. პროვოკაციების ორგანიზების კუთხით, დამკვირვებლებმა განსაკუთრებული ყურადღება უნდა გაამახვილონ ნაციონალური მოძრაობის წარმომადგენლებზე, დევი ჭანკოტაძეზე, დიმიტრი შაშკინსა და ნიკანორ მელიაზე. ახლახანს გახდა ჩვენთვის ცნობილი, რომ მათ მობილიზებული ჰყავთ ეკიპაჟები, რომლებიც აღჭურვილი არიან ხელკეტებითა და ელექტროშოკებით. მათი გარკვეული ნაწილი არის ყოფილი სამხედრო მოსამსახურე და პოლიციელი და შესაბამისად, მათ აქვთ იარაღის ტარების უფლებაც. ჩვენ ხელში ჩაგვივარდა ნაციონალური მოძრაობის ოფისებიდან გამოჟონილი იმ ადამიანების სიები, რომლებიც მათ მიერ დესტრუქციული ქმედებებისთვის არიან მობილიზებული", — განაცხადა კობახიძემ სპეციალურ ბრიფინგზე.

კითხვას, აქვთ თუ არა ამ ინფორმაციის დამადასტურებელი მასალები, ქართული ოცნების ერთ-ერთი ლიდერი პასუხობს, რომ აქვთ სიები და ინფორმაცია აღჭურვილობის შესახებ. სხვა მასალებზე მას არ უსაუბრია.

ბრალდებებს ოპოზიიცაში კომიკური, თავად კობახიძეს კი "შოკი" უწოდეს და კობახიძე საარჩევნო პროცესზე დასაკვირვებლად მიიწვიეს.

გაიგეთ მეტი ოპოზიციის პასუხზე:

წინასაარჩევნოდ ოპოზიციამ არაერთხელ დაადანაშაულა მმართველი გუნდი როგორც ფიზიკურ თავდასხმებში, ასევე, არჩევნებზე გავლენის მოხდენის მცდელობაში. ფიზიკური დაპირისპირების საქმეებზე დაწყებულია გამოძიება.