ერთიანი ნაციონალური მოძრაობის ერთ-ერთი ლიდერი, სალომე სამადაშვილი კობახიძის განცხადებას გამოეხმაურა, რომელმაც თქვა, რომ ოპოზიციას წინასაარჩევნოდ ხელკეტებითა და ელექტროშოკებით აღჭურვილი ეკიპაჟები ჰყავს მობილიზებული და აღნიშნა, რომ მისი განცხადებები კომიკური თემა გახდა, მათ შორის, საერთაშორისო პარტნიორებისთვის.

"შევხვდი, ფაქტობრივად, ყველა სადამკვირვებლო მისიას, რომელიც მოვლენილია საქართველოში. ის ბოდვები, რაც ჩვენ გვესმის ბატონი კობახიძის ბრიფინგებზე, ის ოპოზიციას ადანაშაულებს ხან ფარული შტაბის არსებობაზე, ხან ხელკეტების მომარაგებაში, ადრე აცხადებდნენ, რომ ერთიანი ნაციონალური მოძრაობა საბურავებს აგროვებს, ადანაშაულებენ ამბოხის დაგეგმვაში. ამ ყველაფერს გარდა იმისა, რომ ეუბნება ქართულ საზოგადოებას, აწვდიან ჩვენს საერთაშორისო პარტნიორებს. ეს ყველაფერი ჩვენი ქვეყნისთვის და სახელმწიფოსთვის იღებს ძალიან სახიფათო სახეს, რადგან ბატონი კობახიძე საუბრობს მმართველი პარტიის სახელით, რომელიც წარმოადგენს ჩვენს ქვეყანას და უბრალოდ უხერხულ მდგომარეობაში აყენებს ჩვენს სახელმწიფოს", — განაცხადა სალომე სამადაშვილმა.

სამადაშვილის განცხადებით, ყველაფერს აქვს თავისი დრო და მათ შორის ქართული ოცნების დრო პოლიტიკაში ამოიწურა. მისივე თქმით, პოლიტიკა ასეთია, რაც კობახიძეს როგორც ჩანს არ ესმის, ხან მოიგებ, ხან წააგებ და წაგების შემთხვევაში სახე არ უნდა დაკარგო.

"რეალურად დღეს მიმდინარეობს დაშინება, რომ ამომრჩეველი ხვალ არ მივიდეს საარჩევნო უბნებზე. მინდა, კიდევ ერთხელ შევახსენო ყველა ამომრჩვეველს, თქვენი ფარულობა და არჩევანი არის სრულად დაცული, ნუ შეგეშინდებათ, ხვალ ყველა მიდით არჩევნებზე", — აღნიშნა სამადაშვილმა.

სამადაშვილმა აღნიშნა, რომ ასეთი აბსურდული ბრალდებების გავრცელება ქართული ოცნების მხრიდან, მხოლოდ არწმუნებს ჩვენს საერთაშორისო პარტნიორებს, რომ ბიძინა ივანიშვილი და ქართული ოცნება არჩევნებს ძალიან დამაჯერებლად აგებს.