დღეს ცენტრალურმა საარჩვნო კომისიამ შემაჯამებელი ბრიფინგი გამართა. ცესკოს თავმჯდომარემ, თამარ ჟვანიამ არჩევნების მოსამზადებელ პერიოდსა და უშუალოდ კენჭისყრის დღის პროცედურებზე დეტალურად ისაუბრა.

ჟვანია აღნიშნავს, რომ არჩევნებზე მისვლა, მიუხედვად კოვიდმდგომარეობისა, სრულიად უსაფრთხოა, რადგან კენჭისყრის შენობაში გათვალისწინებული იქნება ყველა ის პრევენციული ღონისძიება, რაც ხელს შეუშლის ინფექციის გავრცელებას.

თამარ ჟვანიას განცხადებით 31 ოქტომბრს არჩევნებისთვის სრულ მზადყოფნაშია 3 657 საარჩევნო უბანი, გამონაკლის შემთხვევაში შექმნილი 11 უბანი და სტაციონარულ სამკურნალო დაწესებულებებსა და იზოლაციაში (კარანტინი, თვითიზოლაცია) მყოფი ამომრჩევლების არჩევნებში მონაწილეობის უზრუნველყოფის მიზნით შექმნილი 127 სპეციალური უბანი. ასევე 52 საარჩევნო უბანი მსოფლიოს 38 ქვეყანაში (მათ შორის, ორი ავღანეთში).

"ხვალ, 08:00 საათზე ყველა საარჩევნო უბანი მზად იქნება ამომრჩეველთა მისაღებად. საარჩევნო ოლქებს უკვე გადაეცათ ბიულეტენები, ოქმები, ასევე სანიტარიულ-ჰიგიენური ნორმების დაცვისთვის საჭირო ყველა ინვენტარი და აქტიურად მიმდინარეობს საარჩევნო დოკუმენტაციისა და შესაბამისი მასალის უბნებზე გადაცემის პროცესი", — განაცხადა თამარ ჟვანიამ.

ცესკოს თავმჯდომარემ, ბრიჯინგზე ისაუბრა აჭარის ავტონომიური რესპუბლიკის უმაღლესი საბჭოს არჩევნებზე, ასევე, რამდენიმე ოლქში საკრებულოს შუალედურ და მერების რიგგარეშე არჩევნებზე.

"საკრებულოების შუალედური არჩევნები ქალაქ თბილისის, თელავის, თეთრიწყაროსა და ონის მუნიციპალიტეტების ადგილობრივ მაჟორიტარულ საარჩევნო ოლქებში, ჯამში 39 საარჩევნო უბანზე გაიმართება. მერების რიგგარეშე არჩევნები კი კასპის, ონის, ხარაგაულის, თერჯოლისა და ქუთაისის მუნიციპალიტეტებში, ჯამში 254 საარჩევნო უბანზე", — აცხადებს ჟვანია.

ცესკოს თავმჯდომარე მოუწოდებს ყველას, თავი შეიკავონ კონრეტული საარჩევნო სუბიექტების აგიტაციისგან არჩევნების დღეს კენჭისყრის ტერიტორიაზე.

"31 ოქტომბერს, 20:00 სთ-ზე, კენჭისყრის პროცესის დასრულების შემდეგ დაიწყება ხმის დათვლის პროცედურები. მას შემდეგ, რაც შედგება საუბნო შემაჯამებელი ოქმები, ისინი შესაბამისი საოლქო საარჩევნო კომისიების მიერ უმოკლეს ვადაში მოეწოდება ცესკოს და მიღებისთანავე ეტაპობრივად აიტვირთება სპეციალურ ვებ- გვერდზე results.cec.gov.ge", — ამბობს თამარ ჟვანია.

ცესკოს ინფორმაციით, ხვალ, 07:00 საათიდან იმუშავებს ცხელი ხაზი — 2 51 00 51, ასევე, ონლაინ ჩატი.

"ბოლოს, კიდევ ერთხელ მინდა მივმართო საარჩევნო პროცესში ჩართულ ყველა მხარეს, მაღალი პასუხისმგებლობით მოეკიდნონ საარჩევნო პროცესს და ხელი შეუწყონ არჩევნების მშვიდ და თავისუფალ გარემოში ჩატარებას.

განსაკუთრებით მინდა მოვუწოდო ამომრჩევლებს იაქტიურეთ, მოდით არჩევნებზე, და გახსოვდეთ, რომ თქვენი არჩევანი კანონია", — განაცხადა თამარ ჟვანიამ.