საქართველოს მესამე პრეზიდენტმა, მიხეილ სააკაშვილმა განაცხადა, რომ არჩევნების გაყალბებაზე პასუხი არათუ უკან დახევა, არამედ შეტევა და ხალხის მიერ ხელისუფლების ხელში აღება იქნება. აღნიშნული განცხადება ექსპრეზიდენტმა ნაციონალური მოძრაობის მიერ თავისუფლების მოედანზე გამართულ აქციაზე ჩართვისას გააკეთა.

"მე მინდა ვუთხრა ივანიშვილს, გადმოიხედე ზემოდან და კარგად შეხედე ამ ხალხს. არ წაგიცდეს ხელი გაყალბებაზე, იმიტომ, რომ გაყალბებაზე პასუხი იქნება ძალიან მკაცრი. გაყალბებაზე პასუხი არ იქნება უკან დახევა და დაჩმორება, გაყალბებაზე პასუხი იქნება ღირსება, შეტევა და ხალხის მიერ ხელისუფლების ხელში აღება ძალიან სწრაფად და პასუხი გაგეცემა პირადად ძალიან სწრაფად", — განაცხადა სააკაშვილმა.

ექსპრეზიდენტის თქმით,"დაგროვილი დიდი ენერგია ყველა ბარიერს წალეკავს და ყველა გაყალბებას გაანგრევს".

საქართველოში საპარლამენტო არჩევნები 31 ოქტომბერს გაიმართება.