თეთრი ხმაურის მოძრაობა გირჩში შსს-ს თანამშრომლების შესვლას ფეისბუკზე ეხმაურება და ხელისუფლებას მოუწოდებს დაელოდოს საკონსტიტუციო სასამართლოს გადაწყვეტილებას 265-ე მუხლის კონკრეტულ ნორმების კონსტიტუციურობასთან დაკავშირებით და არ გაატაროს მკაცრი პოლიციური ქმედებები გირჩის მისამართით:

"თეთრი ხმაურის მოძრაობამ რამდენიმე თვის წინ გაასაჩივრა სსკ 265 მუხლის იმ ნორმების კონსტიტუციურობა, რომელთა ძალითაც მცენარე კანაფის დათესვა საპატიმრო სასჯელს ითვალისწინებს. საკონსტიტუციო სასამართლომ საქმე წარმოებაში მიიღონ 2016 წლის სექტემბერში და უახლოეს ხანებში ველოდებით გადაწყვეტილების მიღებას.

ხელისუფლებას მოვუწოდებთ დაელოდოს საკონსტუტიცო სასამართლოს გადაწყვეტილებას და ახალი რეალობის გათვალისწინებით შეაფასოს გირჩის ეს აქცია. მანამდე კი მოვითხოვთ რომ სახელმწიფომ არ განახორციელოს მკაცრი საპოლიციო მოქმედებები გირჩის აქციის ორგანიზატორებისა და მონაწილეების მისამართით".

დღეს დილით გირჩის ოფისში შსს-ს თანამშრომლები მივიდნენ. კრიმინალური პოლიციის თანამშრომლები ამოწმებენ, დათესილი მცენარე ნამდვილად მარიხუანაა თუ არა.

10 დღეზე მეტი გავიდა მას შემდეგ, რაც პოლიტიკურმა პარტიამ, გირჩი, საკუთარ ოფისში მარიხუანის დათესვის შესახებ განცხადება გააკეთა. მცენარის დათესვა საქართველოს რამდენიმე ტელევიზიის პირდაპირ ეთერში გადაიცა. 3 დღის წინ კი პარტიის ფეისბუკის ოფიციალურ გვერდზე ახალამოსული მცენარეების ფოტოებიც გამოქვეყნდა.

შსს-მ გამოძიება 31 დეკემბერსვე დაიწყო, თუმცა ამ დრომდე პარტიის ოფისში სამართალდამცავები არ იყვნენ მისული და არც პარტიის წევრები დაუკითხავთ.

მარიხუანის საჯარო დათესვას წინ უძღოდა პარტიის ლიდერის, ზურაბ ჯაფარიძის განცხადება, რომელმაც მთავრობას ულტიმატუმი წაუყენა და მოსთხოვა, მომხდარიყო ნებისმიერი ნარკოტიკის დეკრიმინალიზაცია და მარიხუანის ლეგალიზაცია.