ცენტრალური საარჩევნო კომისიის (ცესკო) გადაწყვეტილებით თვითიზოლაციაში მყოფი პირებისთვის გადასატანი ყუთის მოთხოვნის ვადა გახანგრძლივდა. ცესკოს ინფორმაციით, 26 ოქტომბრის 22:00 საათის ნაცვლად, თვითიზოლაციაში მყოფ ამომრჩევლებს შესაძლებლობა ექნებათ საარჩევნო კომისიას 27 ოქტომბრის დღის 14:00 საათამდე დაუკავშირდნენ და გადასატანი საარჩევნო ყუთის მომსახურება მოითხოვონ.

"უკვე მესამე დღეა სრული დატვირთვით მუშაობს ცესკოს სატელეფონო-საინფორმაციო ცენტრი და 25 ოპერატორი მოქალაქეების მოთხოვნებს აფიქსირებს. საარჩევნო ადმინისტრაცია თვითიზოლაციაში მყოფ ამომრჩევლებს როგორც სოციალური ქსელებისა და მედიის საშუალებით, ისე სატელეფონო შეტყობინებებით მიაწვდის ინფორმაციას ვადის გახანგრძლივების შესახებ", — აცხადებენ ცესკოში.

მათივე ცნობით, ამ დროისთვის გადასატანი საარჩევნო ყუთის მოთხოვნით ცესკოს სატელეფონო-საინფორმაციო ცენტრს 4 000-ზე მეტმა ამომრჩეველმა მომართა და ამ ზარების მიღება ამ წუთებშიც გრძელდება. ცესკო არჩევნებში ჩართულ მხარეებს საარჩევნო ადმინისტრაციისთვის დროულად მიმართვისკენ მოუწოდებს, რაც მათ ამომრჩეველთა სპეციალურ სიაში დარეგისტრირების შესაძლებლობას მისცემს.

19 ოქტომბერს ცესკოში განაცხადეს, რომ კორონავირუსით ინფიცირებულები და იზოლაციაში მყოფი პირები ხმას სპეციალური ყუთით საშუალებით მისცემდნენ.

გაიგე მეტი: