პენიტენციური სისტემის ყველა თანამშრომელი ნაცვლად ორკვირიანი შუალედისა, კვირაში ერთხელ გაივლის PCR ტესტირებას. ინფორმაციას ამის შესახებ უწყება ავრცელებს.

მათივე ცნობით, შუალედში, ყოველ 72 საათში ერთხელ ეს ადამიანები ანტიგენ-ანტისხეულზე სწრაფი ტესტით შემოწმდებიან.

"ახალი სამედიცინო პროტოკოლი კიდევ ერთი პრევენციული ზომაა იმისთვის, რომ პენიტენციურ სისტემაში განთავსებული ბრალდებულ/მსჯავრდებულები გარედან ვირუსის იმპორტისგან იყვნენ დაცულები", — აღნიშნავენ უწყებაში.

მაისიდან, პენიტენციური სისტემის თანამშრომლები PCR ტესტირებას ორ კვირაში ერთხელ გადიოდნენ, ხოლო უწყების ის წარმომადგენლები, რომლებიც ყაზარმულ რეჟიმში მუშაობენ, შესვლამდე მოწმდებიან PCR ტესტით. პენიტენციური სამსახურის ინფორმაციით, ჯამში მაისის ბოლოდან სექტემბრის ჩათვლით სისტემაში 13 253 PCR ტესტი გაკეთდა. ახალი სისტემა, რომელიც კვირაში ერთხელ ტესტირებას გულისხმობს, 23 ოქტომბრიდან ამოქმედდა.