"ეს იყო ნასვამი ახალგაზრდა ბიჭის სპონტანური რეაქცია ამ დაგროვილი ბოღმის და შურისძიების ფონზე კიდევ რომ მოესმა თავისი მამის სახელი ადგა და დაარტყა," - ასე აფასებს რატი გაჩეჩილაძის ადვოკატი ნიკა გვარამიას ცემის ფაქტს. ადვოკატი მიიჩნევს, რომ გამოძიება მხოლოდ ადმინისტრაციული სანქციით უნდა შემოფარგლულიყო:

"რაც შეეხება კვალიფიკაციის შეცვლას, არათუ დამძიმების მიზნით, არამედ, მიგვაჩნია, რომ იმ ფარგლებში, რომელშიც ახლა მიმდინარეობს გამოძიება, ესეც არ არის სწორი იმიტომ, რომ ეს იყო, წმინდა, ერთი-ორი დარტყმა, რომელსაც, კი არ ვაკნინებ, ან ვაბუქებ, მაგრამ ყოველ შემთხვევაში, ეს იყოს მხოლოდ ადმინისტრაციულად დასჯადი ქმედება და საერთოდ არ უნდა დაწყებულიყო სისხლის სამართლებრივი დევნა."

გვარამიას დაცვის მხარე საქმის გადაკვალიფიცირებას 126-ე მუხლიდან 156-ე მუხლზე მოითხოვს. ეს უკანასკნელი გულისხმობს ადამიანის დევნას სიტყვის, აზრის, სინდისის, აღმსარებლობის, რწმენის ან მრწამსის გამო, ანდა მის პოლიტიკურ, საზოგადოებრივ, პროფესიულ, რელიგიურ ან მეცნიერულ მოღვაწეობასთან დაკავშირებით.

7 იანვარს ნიკა გვარამიამ განაცხადა, რომ მას და მის თანმხლებ პირებს ფიზიკური შეურაცხყოფა მიაყენეს.

8 იანვარს, შსს-მ რატი გაჩეჩილაძე ნიკა გვარამიაზე განხორციელებული ძალადობის ბრალდებით დააკავა და გამოძიება საქართველოს სისხლის სამართლის კოდექსის 126-ე მუხლით დაიწყო, რაც "ძალადობას" გულისხმობს.