ერთიანი ნაციონალური მოძრაობის საპარლამენტო ფრაქციის წევრთა უმრავლესობა ფიქრობს, რომ ფრაქციას ნიკა მელიას ნაირი თავმჯდომარე არ სჭირდება. შესაბამისად მელია, 9 იანვარს, შესაძლოა, თავმჯდომარის პოზიციიდან გადააყენონ. ამის შესახებ განცხადება ირმა ნადირაშვილმა გააკეთა.

ნადირაშვილის თქმით, ფრაქციის წევრთა აღნიშნული დამოკიდებულება მელიას ხშირად შეცვლილმა პოზიციებმა განაპირობა:

"ნიკა მელია არის ადამიანი, რომელიც ხშირად იცვლის პოზიციებს. მან ვერ გაუძლო ვერც ერთ კრიტიკულ ვითარებას. მას მერე, რაც მიეკედლა მეორე გუნდს ვითარება და ურთიერთობები უკიდურესად დაიძაბა და პიკს მიაღწია დაძაბულობამ ენმ-ის ამ ორ ფრთას შორის. შესაბამისად, ალბათ, არ უნდა იყოს გასაკვირი, რომ შესაძლოა ადამიანების უმრავლესობა იმ ფრაქციაში ფიქრობდეს, რომ ფრაქციას ასეთი ლიდერი არ სჭირდება. გასაკვირი ის არის, რომ ნიკა მელიას უნდა იყოს ფრაქციის თავმჯდომარე, სადაც ფრაქციის უმრავლესობა სწორედ ასე ფიქრობს."

ნადირაშვილის განცხადებით, ფრაქციის გადაწყვეტილება ხვალ, 9 იანვარს გახდება ცნობილი:

"ხვალ არის ეს სხდომა დანიშნული. გადაწყვეტილებას მიიღებენ ადამიანები კენჭისყრით და ხმათა უმრავლესობით. ჯერ-ჯერობით გადაწყვეტილება მიღებული არ არის. ამას სჭირდება გარკვეული პროცედურები და ამ პროცედურების შედეგი რა იქნება ხვალ ყველა ნახავთ."