ამერიკის შეერთებული შტატების იუსტიციის დეპარტამენტის განცხადებით, 6 რუს სადაზვერვო სამმართველოს ოფიცრებს, მსოფლიოს სხვადასხვა ქვეყანაში განხორციელებული ჰაკერული თავდასხმის ბრალდებით, ბრალი წარუდგინეს. CNN-ის ცნობით, სიაში საქართველოცაა. საქართველოს შემთხვევაში მათ 2019 წელს პარლამენტის ქსელის მოშლის მცდელობა და ქართულ ვებგვერდებზე განხორციელებული თავდასხმა ედებათ ბრალად.

რუსეთის არმიის გენერალური შტაბის მთავარი სადაზვერვო სამმართველოს ქვედანაყოფის ოფიცრებს, ასევე, 2018 წელს ერთ-ერთი მედიის წინააღმდეგ განხორციელებულ თავდასხმაზეც ადანაშაულებენ.

საქართველოს გარდა, ქვეყნებს შორის, რომლებიც რუსმა ოფიცრებმა დაჰაკეს, მოხვდნენ: უკრაინა, აშშ, საფრანგეთი, ნიდერლანდები, დიდი ბრიტანეთი და სამხრეთ კორეა. ციფრულ დანაშაულებებს შორის მოხვდა: 2018 წლის ზამთრის ოლიმპიური თამაშები სამხრეთ კორეაში, 2017 წლის არჩევნები საფრანგეთში. აგრეთვე, კიბერთავდასხმა უკრაინის ენერგო სისტემაზე, რომელიც ქვეყნის დესტაბილიზაციისკენ იყო მიმართული.

ჰაკერული თავდასხმების შედეგად მიყენებული ზიანი 1 მილიარდ დოლარად შეფასდა. CNN-ის თანახმად, ძებნილები რუსეთში იმყოფებიან.