დაავადებათა ეროვნული კონტროლის ცენტრის დირექტორის, ამირან გამყრელიძის განცხადებით, გრიპის ვაქცინის 25 000 დოზა შემოსულია ქვეყანაში, თუმცა მხოლოდ 3 000-დან 3 500-მდე ადამიანი აიცრა.

გამყრელიძის თქმით, 23 ოქტომბრის კვირაში კიდევ 110 000 დოზა გრიპის ვაქცინა შემოვა, ოქტომბრის ბოლოს კი 100 000, რომლითაც უკვე დიდი რისკ ჯგუფები აიცრებიან.

დაავადებათა კონტროლის ეროვნული ცენტრის წარმომადგენლების განმარტებით, რისკჯგუფებში, რომლებსაც აცრას თავდაპირველად გაუკეთებენ, შედიან:

  • ორსულები;
  • ხანდაზმულთა პანსიონატის ბენეფიციარები;
  • ბავშვთა სახლის ბინადრები;
  • საბავშვო ბაღების პედაგოგები და მომვლელი პერსონალი;
  • აივ ინფიცირებულები;
  • C ჰეპატიტის მკურნალობაზე მყოფი პაციენტები და
  • დიალიზზე მყოფი ადამიანები.

იმ ადამიანებისთვის, რომლებიც ჩამოთვლილთაგან რომელიმე კატეგორიას
მიეკუთვნებიან, სეზონურ გრიპზე აცრა დღეიდან დაიწყება და უფასო იქნება. მათ ამისთვის სახელმწიფო პოლიკლინიკებს უნდა მიმართონ.

როგორც ამირან გამყრელიძე განმარტავს, მას შემდეგ, რაც ქვეყანაში ვაქცინის მეორე პარტია შემოვა, სხვა რისკჯგუფებიც აიცრებიან, მათ შორის:

  • სამედიცინო პერსონალი;
  • დიაბეტიანი ადამიანები;
  • რესპირაციული დაავადებების მქონე ადამიანები;
  • ასთმიანი პაციენტები;
  • 65 წელს ზემოთ სხვა თანმხლები დაავადებების მქონე ადამიანები;
  • გულსისხლძარღვთა დაავადებების მქონე პაციენტები, რომლებიც 65 წელს ზევით არიან.