ყირგიზეთის პრეზიდენტის ადმინისტრაციის ცნობით, ქვეყნის პრეზიდენტი, სორონბაი ჟეენბეკოვი თანამდებობიდან გადადგა. ჟეენბეკოვის განცხადებით, ქვეყნისა და ერის ერთიანობა და საზოგადოების სიმშვიდე მისთვის უპირველესია. მისივე თქმით, თანამემამულეების სიცოცხლეზე ძვირფასი მისთვის არაფერია.

"სამწუხაროდ, დაძაბულობა არ იკლებს. ჩემს გადადგომაზე მოთხოვნა გრძელდება. განვითარებულ მოვლენებს ორმხრივ კონფლიქტამდე მივყავართ. არ მინდა ისტორიაში შევიდე პრეზიდენტად, რომელმაც თავის მოქალაქეებს ესროლა და სისხლი დაღვარა. ამიტომ მივიღე გადაწყვეტილება, გადავდგე", — განაცხადა ჟეენბეკოვმა თანამოქალეებისადმი გაგზავნილ მიმართვაში.

მან, ასევე, თავის მოწინააღმდეგეებს მოუწოდა თავიანთი მომხრეები ქუჩებიდან გაიყვანონ, რათა ბიშკეკელები ცხოვრების ჩვეულ რიტმს დაუბრუნდნენ.

ყირგიზეთში საპარლამენტო არჩევნების შემდეგ, 5 ოქტომბერს, დედაქალაქ ბიშკეკში ხალხი ქუჩაში გამოვიდა. ისინი საპარლამენტო არჩევნების შედეგებს აპროტესტებდნენ. ადგილობრივმა მილიციამ კი დემონსტრანტები ძალის გამოყენებით — ცრემლსადენი გაზითა და წყლის ჭავლით დაშალა.

მოქალაქეების პროტესტის შემდეგ კი, 6 ოქტომბერს, ყირგიზეთის ცენტრალურმა საარჩევნო კომისიამ 4 ოქტომბრის საპარლამენტო არჩევნების შედეგები გააუქმა, რითაც ათასობით დემონსტრანტის მოთხოვნა დაკმაყოფილდა. თუმცა, ამან ქვეყანაში პოლიტიკური დაძაბულობა არ განმუხდა, ხალხი პრეზიდენტის გადადგომას მოითხოვდა