ყირგიზეთის ცენტრალურმა საარჩევნო კომისიამ 4 ოქტომბრის საპარლამენტო არჩევნების შედეგები გააუქმა, რითაც დააკმაყოფილა ათასობით დემონსტრანტის მოთხოვნა, რომლებიც ქუჩაში გამოვიდნენ და შეიჭრნენ სახელმწიფო შენობებში.

ყირგიზეთში საპარლამენტო არჩევნები 4 ოქტომბერს გაიმართა. წინასწარი მონაცემებით, შვიდპროცენტიანი ბარიერი მხოლოდ ოთხმა პარტიამ გადალახა. ამავე დროს, პარტია ბირიმდიკმა და ყირგიზეთის მექენინმა თანაბარი ნახევარი ადგილი მიიღეს პარლამენტში. ამ უკანასკნელს ძმებ მატრაიმოვების კლანთან აკავშირებენ, რომლებსაც ყირგიზეთში ყველაზე გავლენიან ადამიანებად თვლიან. რაც შეეხება პარტია ბირიმდიკს, მათ პრეზიდენტ სოორონბაი ჟეენბეკოვთან მჭიდრო კავშირზე საუბრობენ.

ყირგიზეთში საპარლამენტო არჩევნების შემდეგ დედაქალაქ ბიშკეკში ხალხი ქუჩაში გამოვიდა. მედუზას ინფორმაციით, ისინი საპარლამენტო არჩევნების შედეგებს აპროტესტებენ. ადგილობრივმა მილიციამ კი დემონსტრანტები ძალის გამოყენებეით — ცრემლსადენი გაზითა და წყლის ჭავლით დაშალა.

მედიის ცნობით, აქცია 5 ოქტომბერს დღის საათებში დაიწყო, სადაც, დაახლოებით, 6 000-მდე ადამიანი მონაწილეობდა. მედუზა წერს, რომ საპროტესტო ტალღას მხარს 11 პარტია უჭერს, რომლებიც პარლამენტში ვერ მოხვდნენ.

დემონსტრანტების დაშლა მილიციამ მას შემდეგ დაიწყო, რაც ისინი მთავრობის შენობისკენ დაიძრნენ და პრეზიდენტის რეზიდენციაში, ჭიშკრის გატეხვით, ძალით შეჭრას შეეცადნენ. სამართალდამცავებმა აქციის მონაწილეები ცრემლსადენი გაზითა და წყლის ჭავლის გამოყენებით დაშალეს. საპასუხოდ, დემონსტრანტებმა ძალოვნებს ქვები დაუშინეს. შედეგად რამდენიმე ათეული ადამიანი დაშავდა, მათ შორის პარტია ატა მეკენის ლიდერი, ჟანარ აკაევი, რომელიც ფეხში დაჭრეს.