დაავადებათა კონტროლის ეროვნული ცენტრის დირექტორის, ამირან გამყრელიძის განცხადებით, პირბადის ტარება აუცილებელია დახურულ შენობებშიც და ღია სივრცეებშიც, სადაც 1,5-2 მეტრიან დისტანციას ვერ ვიცავთ. მისივე თქმით, რეკომენდებულია პირბადე ვატაროთ ყველგან, მათ შორის ქუჩაშიც.

"მე მაინც მოგიწოდებდით, რომ ღია სივრცეებშიც ამ პერიოდში, უკვე ცივ პერიოდში, ატარეთ ყველამ პირბადე. პირბადე 50-დან 75%-მდე ამცირებს ინფექციის გავრცელების რისკს", — განაცხადა გამყრელიძემ.

გამყრელიძის განმარტებით, ინფიცირებულთან 1,5 მეტრიან დისტანციაზე ყოფნის შემთხვევაშიც, თუ ორივე პირბადეს ატარებთ, გადაცემის რისკი არის 1%, ძალიან დაბალი.

გამყრელიძე, ასევე, მოუწოდებს მოსახლეობას, რომ თავი შეიკავონ დიდი შეკრებებისგან, ვინაიდან ბოლო თვე-ნახევარში ყველა გავრცელების წყარო იწყებოდა სწორედ ამ დიდი შეკრებებიდან.

ამირან გამყრელიძემ, ასევე, აღნიშნა, რომ აღნიშნული მისი რეკომენდაციაა და სავალდებულო არაა.