ინფექციური საავადმყოფოს დირექტორის, თენგიზ ცერცვაძის განცხადებით, მობილური ჯგუფები, რომლებიც კლინიკებში აუდიტს ჩაატარებენ და დახმარებას გაუწევენ, თბილისში, აჭარასა და იმერეთში გადანაწილდებიან.

ჯანდაცვის სამინისტროში შეხვედრის შემდეგ თენგიზ ცერცვაძემ აღნიშნა, რომ შეიქმნება ხუთი მობილური ჯგუფი. თითოეულ მათგანში ერთი ინფექციონისტი, ერთი წამყვანი რეანიმატოლოგი და სამინისტროს ერთი წარმომადგენელი იქნება. ამასთან, ორ ჯგუფში პრაქტიკოსი ექიმები დაემატებიან, რომელთაც კოვიდთან ბრძოლის ყველაზე დიდი გამოცდილება აქვთ.

როგორც ცერცვაძე განმარტავს, ერთი გაფართოებული ჯგუფი, სადაც სამი ექიმი ემატება, გაემგზავრება აჭარაში — იქ ისინი პრაქტიკულ დახმარებასაც გაუწევენ. ამასთან, ერთი ჯგუფი გაემგზავრება ქუთაისის და თერჯოლის კოვიდმიმღებ კლინიკებში. სამი ჯგუფი კი თბილისში იქნება.

"ამ ჯგუფს ექნება შერეული ფუნქცია. ერთი, ის გააკეთებს აუდიტს შეაფასებს ყველა სუსტ და ძლიერ მხარეებს ამა თუ იმ კლინიკის. ამის ანალიზს გააკეთებს, რის მიხედვითაც სამინისტრო მოახდენს რეაგირებას. გარდა ამისა, ისინი ადგილზე პრაქტიკულ დახმარებასაც გაუწევს", — განაცხადა ცერცვაძემ.

მისივე თქმით, სამინისტროში შეხვედრაზე მათ მკურნალობის გაიდლაინიც განიხილეს, რომელიც თანამედროვე მოთხოვნების შესაბამისად შეიცვალა.