პენიტენციურ სამსახურში აცხადებენ, რომ ბრალდებულს, რომელიც აჭარაში პოლიციამ 8 ოქტომბერს დააკავა, Covid-19 12 ოქტომბერს დაუდასტურდა. უწყებაში განმარტავენ, რომ ბრალდებული დაწესებულებაში მოთავსებული არ ყოფილა. მათივე ცნობით, მიმდინარე წლის 11 ოქტომბერს, თურქეთის მოქალაქისთვის წინასწარი პატიმრობის შეფარდების შემდეგ, პოლიციის თანამშრომლებმა იგი სპეციალური პენიტენციური
სამსახურის საკარანტინო სივრცეში მიიყვანეს.

"ვინაიდან ბრალდებული აჭარის რეგიონში დააკავეს, იქ არსებული მწვავე ეპიდსიტუაციიდან გამომდინარე, მას პენიტენციური დაწესებულების პერიმეტრის გარეთ გაუკეთდა ანტიგენ-ანტისხეულზე სწრაფი ტესტი, რომელმაც დადებითი პასუხი აჩვენა", — აღნიშნავენ პენიტენციურ დაწესებულებაში.

მათივე ინფორმაციით, ვირუსის შესაძლო გავრცელების პრევენციის მიზნით, 11 ოქტომბრიდან ბრალდებული სამოქალაქო სექტორის კლინიკაში მოთავსებისთანავე ელექტრონული სამაჯურით კონტროლზე აიყვანეს, რათა მასთან კლინიკაში პენიტენციური სამსახურის ესკორტის ოფიცრების ყოფნა საჭირო არ ყოფილიყო. შესაბამისად, პენიტენციურში ირწმუნებიან, რომ ბრალდებული არათუ პენიტენციურ დაწესებულებაში არ ყოფილა მოთავსებული, არამედ პენიტენციური სისტემის თანამშრომლებთანაც შეხება არ ჰქონია.