დღეს, 12 ოქტომბერს საქართველოში ბაღების უმეტესობა გაიხსნა. ბაგა-ბაღების გაერთიანების დირექტორის, კახა გვანცელაძის განმარტებით, კორონავირუსის პრევენციისთვის ბაღები ახალი წესებით იხელმღვანელებს.

კერძოდ, მშობლებს ეკრძალებათ ბაღის შენობაში შესვლა და შვილები გარეთ აღმზრდელთან უნდა დატოვონ. შენობაში შესვლამდე ბავშვები შემდეგ პროცედურებს გაივლიან:

  • ბავშვს ხვდება პირბადით, ხალათითა და ხელთათმანებით ეკიპირებული აღმზრდელი და იბარებს მას;
  • უტარებს თერმოსკრინიგს;
  • შეჰყავს ძირითად საბავშვო ოთახში, სადაც მას ხვდება მეორე აღმზრდელი.

გვანცელაძის თქმით, შეიძინეს დამატებითი ინვენტარი, ასევე, პირბადეები, დეზობარიერები და სადეზინფექციო ხსნარები. მისივე თქმით, შეიცვალა შიდა სივრცეში მოქცევის წესებიც. კერძოდ:

  • გამოიყენება ერთჯერადი ჭიქები;

  • თეთრეულის რეცხვის ინტერვალი შემცირდა და კვირაში ორჯერ გაირეცხება;

  • შეიცვალა დისტრიბუციის წესი;

  • ამოღებული იქნა სათამაშოები, რომელიც ნაკლებრეცხვადი;

  • შეიცვალა სამზარეულოები, დაემატა ჩანები, რომ მაღალ ტემპერატურაზე გაირეცხოს ჭურჭელი.

გვანცელაძის განცხადებით, ბაღებში ბავშვებს აქვთ ინდივიდუალური ჩანთები, სადაც განთავსებულია მათი პერსონალური ნივთები: ფანქრები, პლასტელინები, მაკრატელი და ა.შ. ჩანთებზე არის დაკრული ბავშვის სურათი, რომ მარტივად შეძლონ მიგნება.

კორონავირუსის გამო ბაღები მარტში დაიხურა. სასწავლო პროცესი ოქტომბრის დასაწყისში უნდა განახლებულიყო, თუმცა ინფიცირების შემთხვევების მატების გამო 12-მდე გადაიდო. ბაღები არ გახსნილა აჭარაში, სადაც სკოლებსა და უნივერსიტეტებშიც სწავლა დისტანციურად გრძელდება.