დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

ჯანდაცვის მინისტრ ეკატერინე ტიკარაძის განცხადებით, თბილისში ტრანსპორტის მოძრაობის შეზღუდვასთან დაკავშირებით საუბრობენ, თუმცა მისივე თქმით, ამჟამად ეს პრობლემის მოგვარების ნომერი პირველ გადაწყვეტას არ წარმოადგენს.

"პირველი და მნიშვნელოვანი ღონისძიება პირბადეების გამოყენებაა და ამ მიმართულებით, ვფიქრობთ, ღონისძიებები გავამკაცროთ. რაც შეეხება ტრანსპორტის შეზღუდვას, ამასთან დაკავშირებით ვსაუბრობთ, მაგრამ ეს ამჟამად ამ პრობლემის მოგვარების ნომერ პირველ გადაწყვეტას არ წარმოადგენს. ვინაიდან აქ ჩენ ვითვალისწინებთ დედაქალაქის სიმჭიდროვესა და ასევე, დედაქალაქში ყველა ღონისძიების დაცვის ხარისხს", — განაცხადა ტიკარაძემ უწყებათშორისი საკოორდინაციო საბჭოს წევრების ბრიფინგნგზე.

ეპიდემიოლოგებისა და StopCov-ის მონაცემებით, ბოლო პერიოდში თბილისში კორონავირუსით ინფიცირების შემთხვევებმა იმატა, თუმცა დღიური მაჩვენებელი უმეტესად იმაზე დაბალია, ვიდრე ბათუმში წინა კვირებში იყო.

12 ოქტომბერს კორონავირუსის 478 ახალი შემთხვევა დაფიქსირდა. გამოჯანმრთელდა — 211, გარდაიცვალა — 6.

ამ დროისათვის საქართველოში კორონავირუსის სულ 12 272 შემთხვევაა დადასტურებული. აქედან, 6 538 ადამიანი უკვე გამოჯანმრთელდა.

კარანტინის რეჟიმში 5 590 ადამიანი იმყოფება, სტაციონარში მეთვალყურეობის ქვეშ — 836. კოვიდ სასტუმროში 1 393 პირი მკურნალობს.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: