ბოდბელი მთავარეპისკოპოსი იაკობი ამბობს, რომ ვერ იტყვის ივერი მელაშვილი და ნატალია ილიჩოვა დამნაშავეები ან უდანაშაულოები არიან თუ არა. ამავე დროს, იგი აღნიშნავს, რომ ორივე მათგანი პროფესიონალია.

"სიტუაცია ისეთია, შეიძლება დავარღვიოთ ადამიანის უდანაშაულობის პრეზუმცია, ვერსადროს ვერანაირ ვარიანტე ხო ვერ გამორიცხავს. სინამდვილეში რა არის, წესიერმა სასამართლომ უნდა მონახოს", — უთხრა მეუფე იაკობმა ჟურნალისტებს.

გარდა ამისა, იგი აღნიშნავს, რომ არ ჰგონია, გამოძიება მხოლოდ არქიმანდრიტი კირიონის განცხადების საფუძველზე დაწყებულიყო:

"პროფესიონალები არიან, განზრახვა არ ვიცი და ვერ დავაბრალებ ადამიანს, რა. ვერც დავაბრალებ და ვერც იმავს ვიტყვი, რომ ფრთიანი ანგელოზია. სწორად გამიგეთ", — განაცხადა მეუფემ.

აზერბაიჯანთან საზღვრის დადგენის საქმეზე დაკავებულ ივერი მოლაშვილისა და ნატალია ილიჩოვას 9 ოქტომბერს აღკვეთის ღონისძიების სახით სასამართლომ პატიმრობა შეუფარდა.

ნატალია ილიჩოვას ადვოკატმა გირაოს სახით სასამართლოს 20 000 ლარი შესთავაზა, ხოლო ივერი მელაშვილის ადვოკატი მისი დაცვის ქვეშ მყოფის აღკვეთის ღონისძიების გარეშე დატოვებას ითხოვდა. რაც შეეხება ბრალდების მხარეს, იგი დაკავებულების მიმართ პატიმრობის გამოყენებას მოითხოვდა.

საქართველო-აზერბაიჯანის დელიმიტაცია-დემარკაციის კომისიის წევრების, ივერი მელაშვილისა და ნატალია ილიჩოვას მიმართ სისხლის სამართლებრივი დევნა 7 ოქტომბერს დაიწყო.

დაკავებულებს ბრალი სისხლის სამართლის კოდექსის 308-ე მუხლის პირველი ნაწილით წარედგინათ, რაც გულისხმობს საქართველოს საწინააღმდეგო მოქმედებას, რომელიც მიმართულია უცხო ქვეყნისათვის საქართველოს მთელი ტერიტორიის ან მისი ნაწილის გაცემისკენ ანდა საქართველოს ტერიტორიიდან მისი ნაწილის გამოყოფისკენ.

მელაშვილი საგარეო საქმეთა სამინისტროს მეზობელი ქვეყნების დეპარტამენტის სასაზღვრო ურთიერთობათა სამსახურის უფროსია, ხოლო ილიჩოვა შს სამინისტროს სასაზღვრო პოლიციის სახმელეთო საზღვრის დაცვის დეპარტამენტის მთავარი ინსპექტორია.

მიმდინარე წლის 17 აგვისტოს საქართველოს გენერალურ პროკურატურაში გამოძიება დაიწყო, რომელიც უცხო ქვეყნისათვის საქართველოს ტერიტორიის ნაწილის გაცემისკენ მიმართული მოქმედების განხორციელების საქმეს ეხებოდა. როგორც უწყებაში ამბობენ, საქართველოს საზიანოდ მეზობელი ქვეყანისთვის 3 500-მდე ჰა ფართობი მიწის გადაცემის საფრთხე შეიქმნა.

საქმის აღძვრის შემდეგ საგამოძიებო ორგანოებმა მელაშვილისა და ილიჩოვას სახლები და სამუშაო ოფისები გაჩხრიკეს. ორივე მათგანი გამოძიების დაწყებას პოლიტიკას და არჩევნებს უკავშირდება.

ამავე თემაზე:

• აზერბაიჯანთან საზღვრის საქმეზე კომისიის ყოფილი წევრები ივერი მელაშვილი და ნატალია ილიჩოვა დააკავეს
• აზერბაიჯანთან საზღვრის საკითხზე მელაშვილის ბრალი აბსურდულია — დანიაში საქართველოს ელჩი
• ბრალდება, რაც წარგვიდგინეს, ჩვენთვის ძალიან უცხოა — ილიჩოვა
• საზღვარზე გამოძიება აჩენს ეჭვს, რომ ის პოლიტიკურ მოტივაციებს ემსახურება — არასამთავრობოები
• გარეჯის საქმეზე კომისიის წევრების დაკავების გასაპროტესტებლად აქცია გაიმართა