პარტია რეფორმერის მაჟორიტარი დეპუტატობის კანდიდატი დიდუბე-ჩუღურეთის ოლქში, დავით შალუტაშვილი, აზარტულ თამაშებში მოსახლეობის ჩართულობასთან დაკავშირებით ქვეყანაში შექმნილ მდგომარეობას ეხმაურება.

დავით შალუტაშვილის განცხადებით, რეფორმერის მიერ ჩატარდა კვლევა საქართველოს მოქალაქეების აზარტულ თამაშებში ჩართულობის შესახებ.

"აზარტული თამაშები არის საზოგადობის მიერ განკიცხვადი ქმედება და რესპოდენტების უმეტესობა ცდილობს ინტერვიუს დროს ამ ფაქტის დამალვას. განსაკუთრებით მაშინ, როდესაც ინტერვიუ ოჯახში, ან ნაცნობების თანდასწრები მიმდინარეობს. ამდენად, ჩვენ მიერ კვლევა ჩატარდა ცენტრალურ ლოკაციაზე, რომ მაქსიმალურად დაცული ყოფილიყო რესპოდენტების კონფიდენციალობა. დამოკიდებულთა კრიტერიუმის განსაზღვრა და შესაბამისად, რაოდენობის ზუსტი დათვლა გართულებულია. მიუხედავად ამისა, მიღებული რიცხვები დაფიქრების საბაბს გვაძლევს", — ამბობს შალუტაშვილი.

დეპუტატობის კანდიდატი მათ მიერ ჩატარებული კვლევს შედეგებს გვაცნობს.

"საქართველოში ყოველი მეექვსე (17%) ადამიანი თამაშობს აზარტულ თამაშებს და მათი დიდი უმრავლესობა რეგულარულად. საერთო ჯამში ყოველდღე, ან კვირაში 4-5-ჯერ ფსონს დებს 480 000 მოქალაქე.

რთული განსასაზღვრია, რამდენია აქედან დამოკიდებული თამაშზე. ამისთვის დავაკვირდეთ ფინანსების მიხედვით გაყოფილ სამ ჯგუფს, რომელიც გამოიკვეთებოდა გამოკითხულთა შორის:

• შეძლებული სეგმენტი — 35%
• საშუალო ფენა — 38%
• სიღარიბის ზღვარს ქვემოთ მყოფი ადამიანები — 27%

129 000 მოთამაშე არის ისეთი ოჯახის წარმომადგენელი, რომელსაც ტანსაცმელზე ან კვებაზე სისტემატურად არ ყოფნიდათ ფული, მაგრამ მიუხედავად ამისა თამაშობენ. არის თუ არა ეს დამოკიდებულება?!

ვალი რომელსაც ვერასდროს გადაიხდი, ლომბარდში ჩადებული ქონება და ნივთები, დაკარგული თავმოყვარეობა და მეგობრები, დანგრეული ოჯახები და ფიქრები სუიციდზე — ასე გამოიყურება აზარტულ თამაშებზე დამოკიდებული ადამიანების ყოველდღიურობა.

ფსიქოლოგის აზრით, ნარკოტიკზე ან ალკოჰოლზე დამოკიდებულებისგან განსხვავებით, ლუდომანის გამოვლენა და შემდგომ მკურნალობა გაცილებით რთულია, რადგან ამ შემთხვევაში ადამიანს ფიზიკური დამოკიდებულება ნივთიერების მიმართ არ აქვს. საქმე გვაქვს ფსიქოლოგიურ მიჯაჭვულობასთან და ეს დამოკიდებულება უკონტროლო ხდება. ყოველი ჩვენგანი იცნობს რამდენიმე პატიოსან, მშრომელ ადამიანს ვისაც აქვს ყველას ვალი და საკუთარ თავს აღარ ჰგავს, უკიდურეს სიღარიბემდე არის მისული და ამისი მიზეზი თქვენთვის აუხსნელია. ეს დამოკიდებულების ნიშანია.

ბევრი ორგანიზაცია, მათ შორის ტელევიზიებიც, კაზინოს რეკლამირების შემოსავლებზეა დამოკიდებული. მათ არ აწყობთ შემოსავლის შემცირება. ასეთ ვითარებაში მისასალმებელია ნაბიჯები, რომელიც გადაიდგა 2020 წლის 1-ლი იანვრიდან — აზარტული თამაშების რეკლამირება აიკრძალა საქართველოს საზოგადოებრივი მაუწყებლის ეთერით. ამ მოვლენას წინ უძღოდა ტელევიზიის 29 წლის თანამშრომლის სუიციდის ფაქტი. სათამაშო ბიზნესის რეკლამა 2016 წლის 15 თებერვლიდან აკრძალული პალიტრა მედია ჰოლდინგის პლატფორმებზეც.

მიუხედავად კანონპროექტების ინიციატივების განხილვებისა, უამრავი სტატიისა, კვლევების, საერთაშორისო ორგანიზაციების რჩევისა, ერთეულების ნაბიჯებისა და რეკლამის შეზღუდვებზე საუბრებისა, სიტუაცია არ უმჯობესდება.

საქართველოში არსებული ყველაზე მაღალი ბრუნვის ბიზნესებიდან, 10-დან 6 აზარტული თამაშების ორგანიზაციაა. ბოლო რამდენიმე წელია ონლაინ კაზინოების შემოსავლები მზარდია, რაც იმას ნიშავს, რომ ერი გამოფხიზლების ნაცვლად უფრო იძირება აზარტში და სიღარიბეში. ამას ხელს უწყობენ თავად აზარტული სახლები ყოველ ნაბიჯზე რეკლამებით და ახალი პროდუქტებით. შეიქმნა ინკოგნიტო ბარათების დიდი რაოდენობა, შეიფუთა მოთამაშის გამოაშკარავების სენსიტიური საკითხი და სახსრების ჩარიცხვა, ან განაღდება ხდება ახალი ბარათებით. შედეგად, მოთამაშის იდენტიფიცრება მხოლოდ კაზინოს შეუძლია.

კვლევამ გვიჩვენა, რომ გამოკითხულები ყველაზე აქტიურად თამაშობენ:

• ტოტალიზატორი — 41%
• სლოტები — 38%
• სამაგიდო თამაშები — 9%
• პოკერი — 9%
• ონლაინ კაზინო — 3%

საზოგადოების მიერ ტოტალიზატორი ისე სამარცხვინოდ არ აღიქმება, როგორ სლოტები. თუმცა, კვლევის თანახმად, მოთამაშეების უმრავლესობა გარკვეული პერიოდის შემდეგ ტოტალიზატორებიდან სლოტებზე ერთვებიან და ეს ზღვარი ქრება.

აზარტულ თამაშებზე დამოკიდებულება არის ჩვენი ქვეყნის და საზოგადოების დიდი საფრთხე. არა უშუალოდ კაზინოები, რომლებშიც დასაქმებულია უამრავი ადამიანი, რომლებიც იხდიან გადასახადებს, არამედ ონლაინ სერვისები. მომხმარებლების ნახევარზე მეტს აქვს 2 ან მეტი აქტიური ანგარიში მაშინ, როდესაც მოთამაშეთა 40% უმუშევარია. მათთვის თამაში გამდიდრების ილუზიურ წყაროს წარმოადგენს და სახსრების აბსოლუტური უმრავლესობა, რომელსაც ისინი იყენებენ სათამაშოდ, არის ნასესხები და შედეგად დაკარგული მსესხებლისთვისაც და გამსესხებლისთვისაც. სტატისტიკის მიხედვით, მხოლოდ მოთამაშეების 1% იღებს მოგებას. თუმცა, შემდგომი ერთი თვის განმავლობაში ამ მოგების უკან შებრუნება ხდება.

კიდევ უფრო სავალალოა ახალგაზრდა მოთამაშების რაოდენობა — 18- 4 წლამდე ასაკი წარმოადგენს მოთამაშეების 30%-ს. ეს კატასტროფული მაჩვენებელია. ჯერ კიდევ ჩამოუყალიბებელი ფსიქიკა და არარეალიზებული პოტენციალი ისეთ გარემოში ექცევა, საიდანაც გამარჯვებული მხოლოდ კაზინო შეიძლება იყოს.

თუ მძიმე ნარკოტიკები იწვევენ დამოკიდებულებას და აკრძალულია, რატომ არ უნდა იყოს აკრძალული სათამაშო დამოკიდებულების წყარო?! — აცხადებს დავით შალუტაშვილი, პარტია რეფორმერის მაჟორიტარი დეპუტატობის კანდიდატი დიდუბე-ჩუღურეთის საარჩევნო ოლქში.