აზერბაიჯანთან საზღვრის დადგენის საქმეზე დაკავებული ივერი მელაშვილს ადვოკატის, ედუარდ მარიკაშვილის თქმით, მელაშვილი პატიმრობის სანაცვლოდ არანაირი ალტერნატივის, მათ შორის, არც გირაოს შეთავაზებას არ აპირებს.

"ის მიიჩნევს, რომ ეს არის მისი ბრძოლა, რომელსაც იბრძოლებს ბოლომდე, და არანაირი დათმობა, მხოლოდ იმიტომ, რომ გარეთ იყოს, არ იქნება. გირაოს არ შევთავაზებთ, რადგან ბატონი ივერი არ მიიჩნევს, რომ ეს არის საჭირო", — განაცხადა ადვოკატმა.

საქართველო-აზერბაიჯანის დელიმიტაცია-დემარკაციის კომისიის წევრების, ივერი მელაშვილისა და ნატალია ილიჩოვას მიმართ სისხლის სამართლებრივი დევნა 7 ოქტომბერს დაიწყო.

მელაშვილი საგარეო საქმეთა სამინისტროს მეზობელი ქვეყნების დეპარტამენტის სასაზღვრო ურთიერთობათა სამსახურის უფროსია, ხოლო ილიჩოვა შს სამინისტროს სასაზღვრო პოლიციის სახმელეთო საზღვრის დაცვის დეპარტამენტის მთავარი ინსპექტორია. ორივეს მიმართ პროკურატურა პატიმრობის შეფარედებას მოითხოვს.

მიმდინარე წლის 17 აგვისტოს საქართველოს გენერალურ პროკურატურაში გამოძიება დაიწყო, რომელიც უცხო ქვეყნისათვის საქართველოს ტერიტორიის ნაწილის გადაცემისაკენ მიმართული მოქმედების განხორციელების საქმეს ეხებოდა. როგორც უწყებაში ამბობენ, საქართველოს საზიანოდ მეზობელ ქვეყანას 3 500-მდე ჰა ფართობი მიწის გადაცემის საფრთხე შეიქმნა.

საქმის აღძვრის შემდეგ საგამოძიებო ორგანოებმა მელაშვილისა და ილიჩოვას სახლები და სამუშაო ოფისები გაჩხრიკეს. ორივე მათგანი გამოძიების დაწყებას პოლიტიკას და არჩევნებს უკავშირდება.

ამავე თემაზე: