შსს-ს პრესსამსახურის ცნობით, პანკისში, სოფელ დუისში მომხდარ ინციდენტზე გამოძიება სისხლის სამართლის კოდექსის 187-ე მუხლით დაიწყო. აღნიშნული მუხლი გულისხმობს სხვისი ნივთის დაზიანებას, ან განადგურებას, ხოლო იგივე ქმედება, ჩადენილი ცეცხლის წაკიდებით ისჯება თავისუფლების აღკვეთით ვადით 3-დან 5 წლამდე.

შსს-ს ინფორმაციით, ადგილზე იმუშავეს ექსპერტ-კრიმინალისტება.

სოფელ დუისის კულტურის სახლში ცეცხლი 3 იანვარს გაჩნდა. შეტყობინება ცეცხლის შესახებ პოლიციაში დარაჯმა შეიტანა.

პანკისის სათემო რადიოს ცნობით, ცეცხლის გაჩენის ადგილი არასამთავრობო ორგანიზაცია კახეთის რეგიონული განვითარების ფონდის ოფისია. როგორც ფონდის დირექტორმა, იზა ბექაურმა სათემო რადიოს უთხრა, მათი საქმიანობის გამო, ბოლო პერიოდში, ფეისბუკით მუქარის შემცველი შეტყობინებები მისდიოდა:

"ერთადერთი, რაც პოლიციას ვუთხარი, ის შემიძლია თქვენთან გავიმეორო, რომ ამ ბოლო პერიოდში, ნოემბრის ბოლოს, მქონდა რაღაც უსიამოვნებები ფეისბუქის საშუალებით. კონკრეტულად ვინ იყვნენ ეს ადამიანები, ნამდვილად არ ვიცი. ქალთა ძალადობის წინააღმდეგ აქციას შევუერთდით ჩვენ და ამ ფაქტის დროს იყო რაღაც გაღიზიანება ხალხის, მაგრამ იმის მერე შევხვდით მათ ლიდერებს და მეგონა, რომ ყველაფერი დაწყნარდა. ფეისბუქზე იყო მუქარები, რომ გაეთრიე პანკისიდან, შენი საქმიანობა ჩვენთვის მიუღებელია და ა.შ. მე ვფიქრობ, რომ ეს ერთ-ერთი გაფრთხილება იყო ჩემთვის" - უთხრა პანკისის სათემო რადიოს ბექაურმა.