ლელოს ჯანდაცვის ჯგუფის წარმომადგენლის, ვატო სურგულაძის განცხადებით, ტესტირებამდე იზოლაცია მთავრობის ფარული "დარჩი სახლში" პოლიტიკაა, რაც მისი თქმით, მოსახლეობის სოციალურ-ეკონომიკურ პარალიზებას გამოიწვევს და მასზე სახელმწიფო პასუხისმგებლობას არ აიღებს.

სურგულაძის განცხადებით, აღნიშნული დღეს დამტკიცებული რეგულაციით დადასტურდა, რომლის თანახმადაც ინფიცირებულთან კონტაქტში მყოფი პირი ტესტირების გარეშე თვითიზოლაციაში გადადის. ხოლო თუ სიმპტომებს არ გამოავლენს, 12 დღის შემდეგ იზოლაციისგან თავისუფლდება.

"ეს არის წარმოუდგენელი, რადგან 12 დღის შემდეგ ადამიანს შეუძლია, ასევე ტესტირების გარეშე, გავიდეს გარეთ, მაგრამ იმავე დღეს რომ ჰქონდეს ისევ ვინმე ინფიცირებულთან შეხება, ისევ თვითიზოლაციაში უნდა დაბრუნდეს და ასე გაგრძელდება უსასრულოდ. ეს არის ფარული პოლიტიკა "დარჩი სახლში"-ს განმეორება", — განაცხადა სურგულაძემ.

დღეს დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ განაცხადა, რომ დამტკიცდა განკარგულება, რომლის მიხედვითაც ინფიცირებულთან კონტაქტში მყოფი პირი ყოველგვარი ტესტირების გარეშე გადადის თვითიზოლაციაში. გამყრელიძის თქმით, იმ შემთხვევაში თუ ინფიცირებულთან კონტაქტის მქონე პირებმა სიმპტომები არ გამოავლინეს, 12 დღის შემდეგ ისინი, ასევე ტესტირების გარეშე, იზოლაციისგან თავისუფლდებიან.