ევროპული საქართველოს საარჩევნო შტაბის ხელმძღვანელი, სერგი კაპანაძე სამართლიანი არჩევნების მიერ გუშინ გამოქვეყნებულ მოხსენებასთან დაკავშირებით აცხადებს, რომ ქართული ოცნება ოპონენტების დისკრედიტაციისთვის ხარჯავდა და ისევ ხარჯავს "შავ ფულს".

"მათი ერთ-ერთი მთავარი სამიზნე არის ევროპული საქართველო და მთავარი ამოცანა მათი ამ შავი დისკრედიტაციის კამპანიის არის ევროპული საქართველოს წარმოჩენა ნაციონალურ მოძრაობად. ეს არის მთავარი მიმართულება Facebook -ზე. გარდა ამისა, ისევ და ისევ საუბარი წარსულზე, ცხრა წელზე, და არა საუბარი მომავალზე", — განაცხადა კაპანაძემ.

კაპანაძის თქმით, როგორც ჩანს ქართულ ოცნებას მიაჩნია, რომ აღნიშნული კამპანია მისი გადარჩენის გზაა.

სამართლიანი არჩევნებისა და დემოკრატიის საერთაშორისო საზოგადოების მიერ გუშინ გამოქვეყნებული ანგარიშის მიხედვით, ოპოზიციის წინააღმდეგ მიმართული ორგანიზებული ფეისბუქგვერდები წინა ხელისუფლებაში მყოფი ყველა პოლიტიკოსის ისევ ნაციონალური მოძრაობის წარმომადგენლად წარმოჩენას ცდილობენ. მათივე თქმით, ოპოზიციის წინააღმდეგ მართული ორგანიზებული კამპანიის სამი ფეისბუქგვერდის უკან ია მეტრეველის მიერ დაარსებული ორგანიზაცია დავასრულოთ დგას.