ევროპული საქართველოს ქუთაისის მაჟორიტარი დეპუტატობის კანდიდატი, ოთარ კახიძე ქუთაისის მერიას კორუფციაში ადანაშაულებს. მისი თქმით, აღნიშნული ეხება გარე განათების ქსელისთვის დაგეგმილი 4 200 ცალი ახალი სანათი მოწყობილობის შესყიდვას და 684 000 ლარის გამოუძიებელ საქმეს.

კახიძემ განაცხადა, რომ სანათების შესყიდვისთვის მერიამ ტენდერი არ გამოაცხადა და უკონკურენტოდ დაუკვეთა სანათები კონკრეტულ მომწოდებელს.

"შედეგად, 90-ვატიან დიოდურ სანათში მერიამ გადაიხადა 275 ლარი, მაშინ, როცა ტენდერის მეშვეობით 150-ვატიანი, ანუ უფრო ძლიერ სანათი ჯდებოდა 112 ლარი. შესაბამისად, მარტო ერთ შესყიდვაში ბიუჯეტიდან მოიპარეს 163 ლარი თითო სანათში, რაც 4 200 ერთეულზე შეადგენს 684 000 ლარს", — აღნიშნა მან.

მისი თქმით, ქალაქში, სადაც მოუწესრიგებელია საკანალიზაციო და სანიაღვრე სისტემები, ასეთი "მასშტაბური და თავხედური კორუფციის ფაქტები" დღემდე გამოუძიებელი არ უნდა იყოს.

"აღნიშნული ნიშნავს, რომ პროკურატურა ხელს აფარებს დამნაშავეებს, რისი მოტივიც შეიძლება იყოს კორუფციული გარიგება ან არჩევნებზე კორუმპირებული ჩინოვნიკების გამოყენება", — განაცხადა კახიძემ.

On.ge ქუთაისის მერიას დაუკავშირდა, სადაც აღნიშნულ ბრალდებასთან დაკავშირებით კომენტარი არ გააკეთეს.