ევროპული საქართველოს მაჟორიტარი დეპუტატობის კანდიდატი ხელვაჩაურის, ქედის, შუახევისა და ხულოს ოლქში, ტარიელ ნაკაძე, ხულოს მუნიციპალიტეტის სოფელ ვერნებში ადგილობრივებს შეხვდა და მათი პრობლემები მოისმინა.

ტარიელ ნაკაიძის თქმით, ამ სოფელში არის საკმაოდ დიდი ეროზიული რელიეფი, რამაც შემდგომში შესაძლოა მეწყრული პროცესები გამოიწვიოს. ნაკაიძე ადგილობრივ ხელისუფლებას მიმართავს, რომ ჩატარდეს სათანადო კვლევები, რათა მოხდეს პრევენცია და მოსახლეობა იყოს დაცული საფრთხისაგან.

ნაკაიძემ ასევე აღნიშნა, რომ ამ სოფლებში მცხოვრები ეკომიგრანტებისათვის საჭიროა შესაბამისი სამართლებრივი ბაზის შექმნა.

"ვერნებში ცხოვრობს 65 კომლი. ჩვენი აქ ამოსვლის მთავარი მიზეზი და მიზანი იყო ის, რომ აღნიშნულ სოფელს აქვს ძალიან მძიმე პრობლემა. ძალიან მძიმე ეროზიული პროცესები ვითარდება ამ სოფელში და მოსახლეობა არის საფრთხის ქვეშ.

ძალიან მნიშვნელოვანია, რომ ვიდრე რაიმე შედეგი დადგება და მას შემდეგ დავიწყებთ აქტიურობას, მანამდე მოხდეს ამ სოფელში შესაბამისი კვლევების ჩატარება. როდესაც ვესაუბრებით ადგილობრივებს, ისინი გვეუბნებიან, რომ დღემდე არ აქვთ რაიმე სახის დასკვნა — არის საფრთხის შემცველი თუ არა აქ ცხოვრება. შეუიარაღებელი თვალითაც კი ჩანს ძალინ სერიოზული საფრთხე.

ამასთანავე, მნიშვნელოვანია ეკომიგრანტების თემა. მნიშვნელოვანია, რომ მოხდეს ეკომიგრანტებთან დაკავშირებული სამართლებრივი ბაზის გაუმჯობესება და ამ მიმართულებითაც დაიწყოს სამუშაოები.

სწორედ ამ მიმართულებით მუშაობა იქნება ჩემი მთავარი მიზანი პარლამენტში, რადგან ეს არ არის მხოლოდ ამ სოფლის პრობლემა. ეს მთლიანდ მთიან აჭარას აწუხებს, რადგან აქედან სხვადასხვა კუთხეში გადასახლებულ ადამიანებს ეს სტსტუსიც არ აქვთ ჯერ, შესაბამისად არსებული შეღავათებითაც კი ვერ სარგებლობენ", — აცხადებს ტარიელ ნაკაიძე.