ევროპული საქართველოს წევრი, ირაკლი აბესაძე, მომავალი წლის ბიუჯეტის პროექტს აფასებს.

მისი თქმით, 2021 წლის ბიუჯეტში კვლავ გაზრდილია საბიუჯეტო და ბიუროკრატიული ფუფუნებისათვის განკუთვნილი ხარჯები. დეპუტატი აღნიშნავს, რომ ივანიშვილის ხელისუფლება ვერ სწავლობს ჭკუას და იმის მაგივრად, რომ მძიმე კრიზისში წნეხი მოუხსნას ეკონომიკას და გადასახადები შეამციროს, პირიქით, ზრდის საბიუჯეტო ხარჯებსა და სახელმწიფო ვალს.

"დარწმუნებულები ვართ, რომ ეს არის ქართული ოცნების მთავრობის მიერ შედგენილი ბოლო ბიუჯეტი, შედგენილი იგივე პრინციპებით და კარგად ვხედავთ, რომ ივანიშვილის ოცნება ვერ სწავლობს ჭკუას და ამ უმძიმესი ეკონომიკური კრიზისის დროსაც კი კვლავ იზრდება საბიუჯეტო ხარჯები, სახელმწიფო ვალი, თუმცა ამის ფონზე ჩვენ მაინც ვერ ვხედავთ ეკონომიკისთვის ისეთი მნიშვნელოვანი პროექტების განხორციელებას, როგორიც იქნებოდა მაგალითად გადასახადების შემცირება, პენსიების მნიშვნელოვანი ზრდა და ა.შ.

რეალურად, ევროპულ საქართველოს აქვს დათვლილი, რომ 2 მილიარდი ლარი შეიძლება გათავისუფლდეს იმ ბიუროკრატიული ფუფუნებისთვის განკუთვნილი ხარჯებიდან, რომელიც შეგვიძლია მივმართოთ გადასახადების შემცირებისკენ, რადგან კრიზისის დროსაც და მანამდეც დაკარგული 100 000 სამუშაო ადგილის ფონზე ბიზნესს მივცეთ ამოსუნთქვის საშუალება, ხელფასების გაზრდის შესაძლებლობა, ახალი სამუშაო ადგილების შექმნის შესაძლებლობა. ეს არის ბიუჯეტი, რომელსაც ელოდება საზოგადოება და სწორედ ეს არის ის ცვლილება, რომელსაც მოიტანს 2020 წლის არჩევნები", — აცხადებს აბესაძე.