მთიანი ყარაბაღის დე ფაქტო რესპუბლიკის პრეზიდენტის პრესსპიკერის, ვაჰრამ პოღოსიანის განცხადებით, სომხური ძალები ფრონტის ხაზის გარკვეული პოზიციიდან უკან იხევენ. პოღოსიანი ამ გადაწყვეტილებას არასაჭირო მსხვერპლის თავიდან აცილებითა და მოწინააღმდეგის სამხედრო ძალისთვის მეტი ზიანის მიყენებით ხსნის.

"ვაგრძელებთ პროფესიონალურ ბრძოლას და ჩვენ არ ვართ შორს იმ დღისგან, როცა მტრის განადგურებულ ჯარს ვიხილავთ. გადაწყვეტილება უკვე მიღებულია, ჩვენ არ გავჩერდებით", — წერს პოღოსიანი ფეისბუქში.

ერთ კვირაზე მეტია მთიან ყარაბაღში სომხეთ-აზერბაიჯანის სამხედრო დაპირისპირება გრძელდება. 27 სექტემბრიდან ფართომასშტაბიანი სამხედრო მოქმედებები მთიან ყარაბაღსა და სომხეთ-აზერბაიჯანის საზღვარზე ამ დრომდე მიმდინარეობს. ორივე მხარე ავრცელებს ინფორმაციას დაღუპულებზე. კონფლიქტში მონაწილე ორივე მხრიდან გარდაცვლილია 300-მდე, როგორც სამხედრო, ასევე, სამოქალაქო პირი, დაჭრილია 1 000-მდე მოქალაქე.

საერთაშორისო თანამეგობრობა მხარეებს ცეცხლის შეწყვეტისა და მოლაპარაკებების განახლებისკენ უშედეგოდ მოუწოდებს. სხვა ქვეყნებისგან განსხვავებული პოზიცია აქვს თურქეთს, რომელიც მომხდარში მხოლოდ სომხეთს ადანაშაულებს და აზერბაიჯანს მხარდაჭერას უცხადებს. სომხეთსა და მთიან ყარაბაღში ამტკიცებენ, რომ ბრძოლებში ჩართულია თურქული არმიაც, რასაც აზერბაიჯანსა და თურქეთში უარყოფენ.