საზოგადოებრივი მაუწყებლის გენერალური დირექტორობის კანდიდატი, ნინო ზაუტაშვილი, მაუწყებლის პრობლემურ საკითხებად შენობას, მართვის სტრუქტურას, გუნდურობის ნაკლებობას, კანონმდებლობასა და პროგრამული პრიორიტეტების შეუსრულებლობას მიიჩნევს. მისი თქმით, მაუწყებლის დირექტორს გრძელვადიანი და მოკლევადიანი გეგმები უნდა ჰქონდეს.

როგორც ზაუტაშვილმა On.ge-ს განუცხადა, ის თანამდებობაზე არჩევის შემთხვევაში, პირველ რიგში, კანონმდებლობაში არსებული პრობლემების მოგვარებას დაიწყებს. თუმცა, მას არ დაუკონკრეტებია რა პრობლემებს ხედავს, ან როგორ წარმოუდგენია ამ პრობლემების გადაჭრის გზები. მისი თქმით, სტრუქტურით, რომლითაც საზოგადოებრივი მაუწყებელი იმართება, „შეუძლებელია მართო რაიმე ორგანიზაცია“.

„2015 და 2016 წლის პროგრამული პრიორიტეტები რომ ვერ შესრულდა, ამისთვის მხოლოდ გენერალური დირექტორი გათავისუფლდა. საინტერესო იქნება და მე ამ კითხვას აუცილებლად დავუსვამ სამეურვეო საბჭოს, ვისი პასუხისმგებლობის საკითხი უნდა დამდგარიყო, გარდა გენერალური დირექტორისა, ის ხომ მარტო არ აკეთებდა საქმეს,“ - აღნიშნა ზაუტაშვილმა, რომელიც მიიჩნევს, რომ პროგრამული პრიორიტეტების კუთხით, არხს საბავშო-შემეცნებით, მუსიკალური და გასართობი პროგრამები აკლია.

კითხვაზე, რა გამოარჩევს მას თავისი კონკურენტებისგან, ზაუტაშვილი ასე პასუხობს: „ჩემი თვისებები, რომელიც მაქვს და ვერ შეიძენ ვერცერთ უმაღლეს სასწავლებელში, მათ შორის ჰარვარდის ჩათვლით. რაც არ უნდა კარგი მენეჯერული განათლება მიიღო, ადამიანი თუ არა ხარ ბუნებით ლიდერი და თუ სანდოობის მომენტს არ იწვევ, გამორიცხულია, რომ შენ შეძლებ გუნდის ჩამოყალიბებას, რომელიც გაერთიანებული ძალებით გააკეთებს მნიშვნელოვან საქმეებს. ასეთი მონაცემები, რასაც მე ვხედავ, ამ კანდიდატებს შორის ვფიქრობ რომ მე მაქვს.“

გარდა ამისა, თანამდებობაზე არჩევის შემთხვევაში, ზაუტაშვილი ონლაინ პლატფორმის შექმნას გეგმავს, სადაც საზოგადოების წარმომადგენელს საშუალება ექნებათ მაუწყებლის გენერალურ დირექტორს ეკონტაქტონ.

ნინო ზაუტაშვილი 1986-2002 წლებში სახელმწიფო ტელევიზიაში (ამდროინდელი საზოგადოებრივი მაუწყებელი) მუშაობდა სხვადასხვა პოზიციაზე, 2002-2009 წლებში ის იყო ტელეკომპანია იმედის შემეცნებითი და გასართობი გადაცემების მთავარი პროდიუსერი და წამყვანი. ზაუტაშვილმა 2009 წელს მუშაობა ისევ საზოგადოებრივ მაუწყებელში გააგრძელა, გადაცემა სამოთხის ვაშლების წამყვანის პოზიციაზე, სადაც 2014 წლამდე იმუშავა. 2013 წლის სექტემბრიდან ის არის გადაცემა რეალური სივრცის ავტორი და წამყვანი.

ზაუტაშვილის გარდა სამეურვეო საბჭო კიდევ 4 კანდიდატს - ნათია კუპრაშვილს, თინათინ (თიკო) ბერძენიშვილს, ვასილ მაღლაფერიძესა და ზაალ ანჯაფარიძეს გაესაუბრება. სწორედ მათ მოახერხეს გამოცხადებული კონკურსის მეორე ტურში გადასვლა.