საზოგადოებრივი მაუწყებლის გენერალური დირექტორობის კანდიდატს, თიკო ბერძენიშვილს, თანამდებობაზე არჩევის შემთხვევაში რამდენიმეპუნქტიანი გეგმის განხორციელება სურს. მისი თქმით, გეგმები საზოგადოებრივი მაუწყებლის ძირითად გამოწვევებს ემყარება. ბერძენიშვილი თავის ხედვაში ანგარიშვალდებულების, ტექნიკურ და ტექნოლოგიურ, ადამიანური რესურსების მართვის პოლიტიკის განსაზღვრას, ინფრასტრუქტურულ პრობლემებს, მაუწყებლის მიმართ ნდობის ამაღლებასა და ჟურნალისტური სტანდარტების დამკვიდრებას გამოყოფს.

„ექვსივე გამოწვევა გამოსულია იმ პრობლემებიდან, რომელიც ახლა საზოგადოებრივ მაუწყებელში არსებობს. ჩვენ ვცდილობდით ამ პრობლემებზე მუშაობას, ნაწილი უკვე ნაწილობრივ გაკეთებულია, ნაწილი ბოლომდეა მიყვანილი, რაღაც ნაწილში ხედვა არის შესაცვლელი, უფრო სწრაფად არის სამოქმედო გეგმა გასაწერი“, - თქვა ბერძენიშვილმა On.ge-სთან ინტერვიუში. ის მიიჩნევს, რომ მაუწყებლის დირექტორმა ცვლილებების განხორციელება პირველივე დღეს უნდა დაიწყოს.

ბერძენიშვილის მოსაზრებით, გამოცდილება მისი ძლიერი მხარეა. რამდენიმე წელია ის საზოგადოებრივ მაუწყებელში მუშაობს, ბოლო 1 წლის განმავლობაში კი მაუწყებლის მედიისა და კომუნიკაციის ბლოკის დირექტორის თანამდებობაზე მუშაობს. როგორც ის ამბობს, ამ თანამდებობაზე მუშაობის დროს მან არაერთი რეფორმა განახორციელა:

„უპირატესობა არის ის, რომ, რა თქმა უნდა, ორგანიზაციის შიგნიდან ვარ კანდიდატი, რომელმაც რეალურად და რეალისტურად იცის ის გამოწვევები, რომელიც ორგანიზაციას აქვს... ის ცვლილებები, რაც ჩემს ბლოკში მოხდა, მათ შორი ადამიანური რესურსების კუთხით, თამამად შემიძლია ვთქვა, ძალიან გამართულად მუშაობს. იგივე მოდელის გადმოტანა შემიძლია მთელ საზოგადოებრივ მაუწყებელზე“.

ბერძენიშვილი გიორგი ბარათაშვილის თანამდებობიდან გადადგომის შემდეგ მაუწყებლის გენერალური დირექტორის მოვალეობას ასრულებს. ის არხის მედიის და კომუნიკაციების ბლოკის დირექტორია. 2011 წლიდან ბერძენიშვილი საზოგადოებრივ მაუწყებელში წამყვანის, საზოგადოებასთან ურთიერთობის სამსახურის უფროსისა და მარკეტინგის დეპარტამენტის დირექტორის თანამდებობას იკავებდა. მან ჟურნალისტური საქმიანობა 1997 წელს გაზეთ ქართულ ფილმში დაიწყო. გარდა ამისა, სხვადასხვა დროს მუშაობდა ტელე-რადიო კომპანია აუდიენციაში, ტელეკომპანია იმედში, არტ იმედში და სადაზღვევო საბროკერო კომპანია NLI LTD-ში.

საზოგადოებრივი მაუწყებლის დირექტორობის კანდიდატებთან სამეურვეო საბჭო გასაუბრებას ხვალ 4 იანვარს იწყებს. მანამდე On.ge ეცდება ყველა კანდიდატის ხედვები შემოგთავაზოთ.

საზოგადოებრივი მაუწყებლის გენერალური დირექტორობა სულ 15 კანდიდატს სურდა, მათგან ბაჩუკი ბახტაძე კონკურსს სამეურვეო საბჭოს მიერ მათი დოკუმენტაციის გაცნობის შემდეგ გამოეთიშა. სამეურვეო საბჭოს 3 იანვრის კენჭისყრის შედეგებით კი, საბჭო გაესაუბრება თინათინ ბერძენიშვილს, ვასილ მაღლაფერიძეს, ზაალ ანჯაფარიძეს, ნინო ზაუტაშვილსა და ნათია კუპრაშვილს.