საზოგადოებრივი მაუწყებლის გენერალური დირექტორობის 5 კანდიდატიდან 2-მა - ზაალ ანჯაფარიძემ და ვასილ მაღლაფერიძემ პრიორიტეტების გამხელა არ ისურვეს On.ge-სთან.

ზაალ ანჯაფარიძე პირველია იმ 5 კანდიდატში, რომელსაც სამეურვეო საბჭო გაესაუბრება. „არანაირი სურვილი არ მაქვს, ვიდრე გასაუბრება არ შედგება,“ - განმარტა დირექტორობის კანდიდატმა.

ვასილ მაღლაფერიძე კი ამბობს, რომ მაუწყებელში განსახორციელებელ გეგმებზე არჩეულმა დირექტორმა უნდა ისაუბროს.

„საზოგადოებრივი მაუწყებელი უნდა გაძლიერდეს და გახდეს ქართული მედიის ფლაგმანი. ამისკენ უნდა ვიღვაწოთ, ეს არის მთელი ქვეყნისთვის ძალიან მნიშვნელოვანი,“ - აღნიშნა მაღლაფერიძემ, რომელმაც მეტი განმარტების გაკეთება არ ისურვა.

ზაალ ანჯაფარიძე ბოლო 11 წელია ევროპის ფონდში სამოქალაქო საზოგადოების პროგრამების უფროსი მენეჯერის თანამდებობაზე მუშაობს, მანამდე კი USAID-ის სხვადასხვა პროექტში, ინგლისურენოვან ყოველკვირეულ გაზეთში Georgia Today-ში, Jamestown Foundation-ში, კავკასიის მშვიდობის, დემოკრატიის და განვითარების ინსტიტუტში და გაზეთ „რეზონანსში“ მუშაობდა.

ვასილ მაღლაფერიძე, CV-ის მიხედვით, ამ ეტაპზე უმუშევარია, ბოლოს კი საქართველოს ყოფილი პრემიერ-მინისტრის ბიძინა ივანიშვილი ოჯახის კუთვნილ ტელეკომპანია GDS-ში გადაცემა 2030-ის გენერალურ პროდიუსერად მუშაობდა. მისი მედიაში მუშაობა ტელეკომპანია GDS-ით არ შემოიფარგლება. სხვადასხვა დროს იყო TV9-ის, რომელიც ასევე ბიძინა ივანიშვილის ოჯახს ეკუთვნის, დირექტორის მოადგილე, ჟურნალ კალმასობა-ს მთავარი რედაქტორი, გაზეთ „კავკასიონის“ დამფუძნებელი, რედაქტორი და მთავარი კონსულტანტი. გარდა ამისა, 2 მოწვევის პარლამენტის წევრი, „ნაციონალური მოძრაობის“ ხელისუფლებაში ყოფნის დროს გუბერნატორი და სახალხო დამცველის აპარატის ინფორმაციისა და პოლიტიკის დეპარტამენტის უფროსი.

ანჯაფარიძისა და მაღლაფერიძის გარდა სამეურვეო საბჭო კიდევ 3 კანდიდატს - ნინო ზაუტაშვილს, ნათია კუპრაშვილსა და თინათინ (თიკო) ბერძენიშვილს გაესაუბრება. საზოგადოებრივი მაუწყებლის დირექტორობის კანდიდატებთან სამეურვეო საბჭო გასაუბრებას ხვალ 4 იანვარს იწყებს.