პარლამენტის თავმჯდომარის, არჩილ თალაკვაძის განცხადებით, "ქველმოქმედება საქვეყნო საქმეებში" ქართული ოცნების ლიდერის, ბიძინა ივანიშვილის უცვლელი ხელწერაა. ასე გამოეხმაურა ის, ინფორმაციას, რომ ივანიშვილი ქალაქს იპოდრომს "სრულიად უსასყიდლოდ გადასცემს".

"ბიძინა ივანიშვილმა წარსულში, უპასუხისმგებლო ჩინოვნიკების მიერ გასხვისებული, უკვე მერამდენე აქტივი გამოისყიდა და საზოგადოებას დაუბრუნა", — განაცხადა თალაკვაძემ.

მისივე თქმით, იპოდრომის ტერიტორიაზე ცენტრალური პარკის გაშენება — ეს არის "უნიკალური საჩუქარი" არა მარტო დედაქალაქისთვის, არამედ მთელი ქვეყნისთვის.

"თბილისის ცენტრალური პარკი არის კიდევ ერთი მასშტაბური, მწვანე პროექტი და მას ექნება ეკოლოგიური, რეკრეაციული და ეკონომიკური მნიშვნელობა", — აღნიშნა თალაკვაძემ.

5 ოქტომბერს, თბილისის მერიამ გაავრცელა ინფორმაცია, რომ ყოფილი პრემიერმინისტრი და ქართული ოცნების ლიდერი, ბიძინა ივანიშვილი ქალაქს იპოდრომს გადასცემს, სადაც ფონდი ქართუს დახმარებით გაშენდება თბილისის ცენტრალური პარკი, რომელიც რამდენიმე ათეული მილიონი დაჯდება.