დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

საქართველოს პრემიერმინისტრის, გიორგი გახარიას თქმით, ეკონომიკის, განათლების სისტემისა და პოლიტიკური პროცესის მუშაობის შეზღუდვის საფუძველი და სურვილი დღეს არ არსებობს. ამის შესახებ მან უწყებათშორისი საბჭოს სხდომაზე განაცხადა.

"ვაგრძელებთ ეკონომიკის მუშაობას, განათლების სისტემის მუშაობას, მიმდინარეობს პოლიტიკური პროცესი, შესაბამისად, არანაირი საფუძველი და სურვილი დღეს ეს შევზღუდოთ, არ გვაქვს", — განაცხადა პრემიერმა.

მთავრობის მეთაურის თქმით, ყველა შესაბამისი სამსახურის პასუხისმგებლობა უნდა გაიზარდოს, რათა პროცესები რთული სამართავი არ გახდეს.

"მეორეს მხრივ, ეს იწვევს იმას, რომ ყველა შესაბამისი სამსახურის პასუხისმგებლობა უნდა გაიზარდოს, ერთმნიშვნელოვნად, სხვანაირად ეს ყველაფერი იქნება უკიდურესად რთული სამართავი", — თქვა გახარიამ.

საქართველოში კორონავირუსის 578 ახალი შემთხვევა გამოვლინდა, 375 ადამიანი გამოჯანმრთელდა. კიდევ ორი ადამიანი გარდაიცვალა.

რაც შეეხება სხვა რეგიონებს, ინფექციური საავადმყოფოს ბოქსირებული განყოფილების ხელმძღვანელის, მარინა ენდელაძის თქმით, ინფიცირებულთა განაწილება შემდეგნაირია:

თბილისი — 72; იმერეთი — 44; სამეგრელო-ზემო სვანეთი — 23; ქვემო ქართლი — 10; გურია — 8; სამცხე-ჯავახეთი — 3; კახეთი — 1; შიდა ქართლი — 1.

ენდელაძის განცხადებით, ამ ეტაპისთვის 45 შემთხვევაა კრიტიკული, 43 მართვით სუნთქვაზეა, მათგან 9 ოკუპირებული აფხაზეთიდანაა.

სულ ქვეყანაში კორონავირუსის 8 696 შემთხვევაა დადასტურებული. აქედან 4 619 ადამიანი უკვე გამოჯანმრთელდა, 52 კი გარდაიცვალა.

ამ დროისთვის კარანტინის რეჟიმში 5 392 ადამიანი იმყოფება, სტაციონარში მეთვალყურეობის ქვეშ კი — 836. კოვიდ სასტუმროში 1 100 პირი მკურნალობს.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: