ტელეკომპანია იმედის თანამშრომელს, ზურა ბალანჩივაძეს კორონავირუსი დაუდასტურდა. ინფორმაცია ამის შესახებ თავდაპირველად იმედმა გაავრცელა, სადაც აღნიშნული იყო, რომ იდენტიფიცირებულია მისი ყველა კონტაქტი და ამჟამად ისინი თვითიზოლაციაში იმყოფებიან. ამასთან, ტელეკომპანიის ინფორმაციით, შენობაში უკვე ჩატარდა სადეზინფექციო სამუშაოები და არხი მუშაობას განაგრძობს ჩვეულ რეჟიმში, ჯანდაცვის სამინისტროს რეკომენდაციების სრული დაცვით.

თავად ბალანჩივაძემ ინფიცირების შესახებ დღეს Facebook-ზე დაწერა. იმედი დილის თანაწამყვანი აღნიშნავს, რომ სიმპტომები ყელის მსუბუქი ტკივილითა და გადაღლილობით დაეწყო. მისივე ინფორმაციით, არ ჰქონდა ტემპერატურა და იმყოფებოდა ტელეკომპანია იმედის შენობაშიც.

"გუშინ დილას ჩვეულებრივად მივედი იმედში, სიცხე გამიზომეს და 36,1 აჩვენა. სადღაც 9-ისკენ ცოტა მოვითენთე და გადაცემის მერე კიდევ გავიზომე სიცხე — 36,6. არაფერი. ცოტა ხანს ვიყავი, ვისაუბრეთ და წავედი სახლში. წამოვწექი, დავიძინებ მეთქი და მივხვდი, რომ სიცხე მიმატებს. გავიზომე და 37,7. [...] სად დამემართა და ვისგან გადმომედო —აზრზე არ ვარ. პლუს ბოლო 4-5 დღეა, ძალიან ცოტა ადამიანი ვნახე. 30 ალბათ. ჰოდა კაცმა არ იცის, ვინმე უსიმპტომოსგან გადამედო თუ რომელიმე ზედაპირთან შეხებისას.

სიმპტომების გამოვლენის დღედ ჩაითვალა 1-ლი ოქტომბერი, რომლიდან 48 საათის მონაკვეთი უკან არის გადამდებობის დაწყების დრო (28 სექტემბრის საღამო). ასე რომ ყველას, ვისაც ჩემთან შეხება გქონდათ, გთხოვთ, გადახვიდეთ თვითიზოლაციაში. ასე სჯობს", — წერს ზურა ბალანჩივაძე.

მისივე თქმით, მკურნალობას სახლში აგრძელებს, აქვს 38-მდე სიცხე და ყელის "ჩახეხილობა". როგორც ზურა ბალანჩივაძე წერს, სხვა გართულებები არ აქვს და არც "ყნოსვა-გემოც ადგილზეა".