ევროპული საქართველოს მაჟორიტარობის კანდიდატი ვაკისა და საბურთალოს ოლქში, ელენე ხოშტარია, ამერიკის ელჩის, კელი დეგნანის განცხადებას ეხმაურება წინასაარჩევნო პერიოდში ძალადობის ფაქტებთან დაკავშირებით.

ელენე ხოშტარიას თქმით, მნიშვნელოვანია, რომ უცხოელი პარტნიორები აქტიურად აფიქსირებენ მათ პოზიციას წინასაარჩევნო გარემოსთან დაკავშირებით. ხოშტარიას თქმით, სწორედ მათ შეფასებას ექნება დიდი გავლენა არჩევნების საბოლოო ლეგიტიმაციაზე.

ხოშტარიამ ხელისუფლების წარმომადგენლებს მიმართა, რომ სერიოზულად გაფრთხილებად აღიქვან ელჩის განცხადება.

"ჩვენი საერთაშორისო პარტნიორები და განსაკუთრებით, რა თქმა უნდა, ელჩები ადგილზე და ამერიკის ელჩი, არაერთხელ საუბრობდნენ იმაზე, რომ ეს არჩევნები უნდა ჩატარდეს ძალადობის დემონსტრირების გარეშე და ძალიან მნიშვნელოვანია, რომ ისინი აქტიურად აფიქსირებენ ამ პოზიციებს და საბოლოოდ, ამ გარემოს ექნება გავლენა, რამდენად იქნება აღიარებული ეს არჩევნები. ამიტომ კარგად უნდა გვესმოდეს, რომ ჩვენს პარტნიორებს, ჩვენი ქვეყნის გულშემატკივრებს აქვთ სრული ინფორმაცია იმაზე, რაც ხდება და ეს განცხადება ქართულმა ოცნებამ უნდა აღიქვას სერიოზულ გაფრთხილებად წინასაარჩევნო პერიოდში", — განაცხადა ხოშტარიამ.