აშშ-ს პრეზიდენტსა და პირველ ლედის კორონავირუსი დაუდასტურდათ. ინფორმაციას ამის შესახებ ტვიტერზე დონალდ ტრამპი ავრცელებს.

"ჩვენ დაუყოვნებლივ გადავალთ კარანტინში და გამოჯანმრთელების პროცესს დავიწყებთ. ამას ერთად დავძლევთ", — წერს დონალდ ტრამპი.

მანამდე ტესტზე დადებითი პასუხი ჰქონდა დონალდ ტრამპის მრჩეველს, 31 წლის ჰოუპ ჰიკს. იგი ოჰაიოში 29 სექტემბერს საპრეზიდენტო დებატებზე პრეზიდენტთან ერთად გაემგზავრა. მრჩევლის ინფიცირების შემდეგ პრეზიდენტი და პირველი ლედი კარანტინში გადავიდნენ და ტესტის პასუხებს ელოდნენ.

ჯერჯერობით უცნობია როგორ გავლენას იქონიებს პრეზიდენტის ინფიცირებას შემდეგ საპრეზიდენტო დებატებზე, რომელიც 15 ოქტომბერსაა დანიშნული.

COVID-19-ის პანდემიის დაწყების შემდეგ დემოკრატიული პარტიის წარმომადგენლები ტრამპს ხშირად ადანაშაულებენ იმის გამო, რომ მან შესაბამისი ზომები არ მიიღო, რასაც არაერთი სიცოცხლე შეეწირა. ამასთან, პრეზიდენტს აკრიტიკებდნენ იმის გამოც, რომ არ იცავდა სოციალურ დისტანციას და არ ატარებდა პირბადეს.

ტესტის დადებით პასუხამდე ერთი დღით ადრე დონალდ ტრამპმა მინესოტაში მიტინგი გამართა და ამომრჩეველს შეხვდა. როგორც სხვა ღონისძიებებზე, აქაც მას პირბადე არ ეკეთა.