გარდაცვლილი ბარბარე რაფალიანცის დედა, თათია მექერიშვილი ამბობს, რომ შვილის გარდაცვალების გამო ნაციონალური მოძრაობის დადანაშაულება "ცხელ გულზე" მოუვიდა. ამის შესახებ მან მთავარ არხთან ისაუბრა.

"ამდენი მინისტრი შეიცვალა, მაგრამ არაფერი გამოძიებულა. მაშინ ნაადრევი გადაწყვეტილება მივიღე, ცხელ გულზე დავადე ნაციონალებს ხელი. ხო იძახოდნენ ნაციონალების გაკეთებულიაო და სისხლისმღვრელი ნაციონალები და რაღაცა. ფაქტი სახეზეა. მოვიდა ქართული ოცნება [ხელისუფლებაში]. თუ ნაციონალების გაკეთებულია, რატომ არ გამოიძიეს? გადაბრალება იყო, არა ნაციონალებმა გააკეთეს, არა ოცნებამ გააკეთა და მე ვიჭყლიტებოდი. მეც ვაბრალებდი ნაციონალებს, მაგრამ ამ ეტაპზე აღარ ვაბრალებ", — ამბობს თათია მექერიშილი.

2012 წლის 30 სექტემბერს, გურჯაანის რაიონის სოფელ კოლაგში, 10 თვის ბარბარე რაფალიანცი ქვევრში გარდაცვლილი იპოვეს. მაშინ ოპოზიციაში მყოფმა ქართულმა ოცნებამ ბავშვის მკვლელობაში ნაციონალური მოძრაობა დაადანაშაულა.

არჩევნებში ქართული ოცნების გამარჯვების შემდეგ, შინაგან საქმეთა მინისტრმა ირაკლი ღარიბაშვილმა რამდენჯერმე საჯაროდ დადო პირობა, რომ საქმეს სწრაფად გამოიძიებდნენ. 2014 წელს პარლამენტმა ბარბარე რაფალიანცის საქმის გამოძიებასთან დაკავშირებით დროებითი საგამოძიებო კომისიის შექმნას მხარი არ დაუჭირა. გამოძიების შედეგი დღემდე უცნობია.