ბელარუსის დედაქალაქ მინსკის აეროპორტში კალათბურთელი ელენა ლევჩენკო დააკავეს. TUT.BY-ს ინფორმაციით, ელენამ ადვოკატ მიხაილ კირილიუკს აცნობა, რომ ის საზღვარგარეთ სამკურნალოდ მიემგზავრებოდა. ადვოკატის თქმით, მას არაკანონიერ მასობრივ ღონისძიებაში მონაწილეობას ედავებიან. კალათბურთელის სასამართლო პროცესი დღესაა ჩანიშნული.

მედია გამოცემა წერს, რომ ლევჩენკო ბელარუსში მიმდინარე ძალადობის შესახებ ღიად საუბრობდა და განმეორებითი არჩევნების ჩატარებას ითხოვდა. ის, ასევე, ბელარუსის თავისუფალ სპორტსმენთა გაერთიანების წევრი იყო და ბელარუსის პრეზიდენტ ალექსანდრე ლუკაშენკოს საწინააღმდეგო აქციებში აქტიურად მონაწილეობდა.

ელენა ლევჩენკო ბელარუსის ერთ-ერთი ცნობილი კალათბურთელია.

ბელარუსში საპროტესტო აქციების პარალელურად ალექსანდრე ლუკაშენკოს ხელისუფლების მხრიდან რეპრესიები კვლავ გრძელდება. აქციებზე აკავებენ ათეულობით ადამიანს, ოპოზიციის წევრებს კი დაკითხვებზე იბარებენ. რამდენჯერმე გავრცელდა ინფორმაციაც დაკარგულებზეც.

მოქალაქეები ალექსანდრ ლუკაშენკოს კვლავ გაპრეზიდენტებას აპროტესტებენ და არჩევნების თავიდან ჩატარებას მოითხოვენ. არჩევნების შედეგებს არ აღიარებს გაერთიანებული ოპოზიციის კანდიდატი სვეტლანა ტიხანოვსკაია, რომელიც შედეგების გამოცხადების შემდეგ იძულებული იყო, ქვეყანა დაეტოვებინა. მისი ინიციატივით, ძალაუფლების მშვიდობიანი გადაბარებისთვის საკოორდინაციო საბჭო შეიქმნა.

ევროპარლამენტმა ბელარუსში აგვისტოში ჩატარებულ არჩევნებს გაყალბებული უწოდა და არ აღიარა. ევროპარლამენტის თქმით, ლუკაშენკოს 5 ნოემბრიდან, როცა მისი უფლებამოსილების ვადა ამოიწურება, პრეზიდენტად აღარ აღიარებენ. ასევე, ბევროკავშირს მოუწოდეს, რომ ლუკაშენკოს ეკონომიკური სანქციები დაეკისროს.