აფხაზეთის დე ფაქტო ჯანდაცვის უწყების ინფორმაციით, 28 სექტემბერს ოკუპირებული აფხაზეთის გუდაუთის ცენტრალურ საავადმყოფოში Covid-19-სგან 58 წლის კაცი გარდაიცვალა. ე.წ. ჯანდაცვის სამინისტროს ინფორმაციით, ინფიცირებული საავადმყოფოში 9 სექტემბერს, სუნთქვის უკმარისობით ორმხრივი პნევმონიის ფონზე, მოათავსეს. მანამდე ის სახლში დამოუკიდებლად მკურნალობდა, კლინიკაში კი მდგომარეობის გართულების შემდეგ გადაიყვანეს.

დე ფაქტო სამინისტროს განმარტებით, დღეს, 28 სექტემბრის მონაცემებით, კორონავირუსი კიდევ 20 ადამიანს დაუფიქსირდა. თუმცა, უცნობია, რამდენად ზუსტია ეს მონაცემები, რადგან საქართველოს ცენტრალურ ხელისუფლებას რეგიონიდან ზუსტი ინფორმაცია არ აქვს.

ე.წ. ჯანდაცვის სამინისტროს ცნობით, ამ დროისათვის გუდაუთის საავადმყოფოში Covid-19-ის დიაგნოზით 106 ადამიანი მკურნალობს. 14 მათგანის ჯანმრთელობის მდგომარეობა მძიმეა, 27 პაციენტი საშუალო სირთულისაა, 9 — გამოჯანმრთელდა. ამბულატორიულად, თვითიზოლაციაში გამოჯანმრთელდა 25 პაციენტი.

დე ფაქტო ჯანდაცვის უწყების განმარტებით, ჯამში კორონავირუსი 1 352 ადამიანს დაუდასტურდა, მათ შორის 434 გამოჯანმრთელდა, გარდაიცვალა — 10.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: