უცხოურ მედიაში აქამდეც აქტიურად ვრცელდებოდა ინფორმაცია, რომ ცნობილი ამერიკული თინეიჯერული დრამის Pretty Little Liars შესახებ ახალი სერიალის გადაღებას გეგმავდნენ, სულ ახლახანს კი სტრიმინგ სერვისმა HBO Max-მა დაადასტურა, რომ ამ პროექტს ნამდვილად განახორციელებენ.

ახალი შოუს სახელწოდებაა Pretty Little Liars: Original Sin (პატარა საყვარელი მატყუარები: თავდაპირველი ცოდვა) და მისი სიუჟეტი ახალ ქალაქში, მილვუდში მცხოვრები სულ სხვა თაობის პერსონაჟების შესახებ მოგვითხრობს.

"ეს ის არ არის, რაც თქვენ გეგონათ, ძუკნებო", — მსგავსი დამაინტრიგებელი თიზერით დაანონსდა სერიალი, რომელმაც უკვე ფანებში მრავალ თეორიას ჩაუყარა საფუძველი.

სერიალის მოკლე აღწერის მიხედით, შოუს სცენარი კვლავ თინეიჯერი გოგოების შესახებ მოგვითხრობს, რომელთაც საერთო მტერი გამოუჩნდებათ. ეს ყველაფერი კი ერთდროულად დაკავშირებული იქნება როგორც მათ მშობლიურ ქალაქში 20 წლის წინ მომხდარ ტრაგიკულ შემთხვევასთან, ისე კი მათ პირად შეცდომებთან.

მოკლედ, ყველაფერი ის, რასაც პატარა საყვარელი მატყუარების ფანები აქამდეც მიჩვეულები იყვნენ, არც მომავალ შოუში მოაკლდებათ.

აღსანიშნავია, რომ ეს პირველი შემთხვევა არ არის, როცა ამ ცნობილი პროექტის მიხედვით სპინოფ სერიალს იღებენ: 2019 წელს გამოვიდა Pretty Little Liars: The Perfectionists, თუმცა წარუმატებლობის გამო პირველივე სეზონით დახურა.

Pretty Little Liars: The Perfectionists (2019)

ფოტო: Disney Enterprises

ამ ახალი შოუს შექმნაზე Riverdale-სა და Chilling Adventures of Sabrina-ს შემოქმედი, რობერტ აგირა იმუშავებს.

"გვინდა, რომ ამ ახალ სერიალში სასპენსისა და ჰორორის ელემენტები უფრო მეტად წარმოვაჩინოთ, რითიც მაყურებელს იმასაც ვაჩვენებთ, რაც უყვართ ამ შოუში და ამავდროულად მოულოდნელობებითაც გავაოცებთ", — აღნიშნა მან.

მოკლედ, HBO Max წინ ნამდვილ სიურპრიზებს გვიმზადებს, თანაც ისიც უნდა გავითვალისწინოთ, რომ პატარა საყვარელი მატყუარები ერთადერთი ცნობილი თინეიჯერული სერიალი არაა, რომელსაც ხელახლა შთაბერავენ სულს: მალე Gossip Girl-იც დაბრუნდება ეკრანებზე ახალი სამსახიობო გუნდით.