ჯერ კიდევ ერთი წის წინ გავრცელდა უცხოურ მედიაში დაუდასტურებელი ინფორმაცია, რომ HBO თანამედროვე პოპკულტურაში ერთ-ერთი ყველაზე პოპულარული თინეიჯერული სერიალის, Gossip Girl-ის ეკრანებზე დაბრუნებაზე ფიქრობდა.

მას შემდეგ კი, რაც ცნობილი გახდა, რომ ახალ სტრიმინგ სერვისზე, HBO Max-ზე საკულტო სიტკომის, Friends-ის გმირებს კვლავ ერთად ვიხილავთ, უკვე ოფიციალურად ისიც დადასტურდა, რომ ამავე სტირიმინგ სერვისისთვის Gossip Girl-ის გაგრძელებასაც იღებენ.

Variety-ის ცნობით, ახალი სატელევიზიო შოუ ერთგვარი სიქველი იქნება და Gossip Girl-ის ფინალიდან რვა წლის შემდეგ განვითარებულ მოვლენებზე მოგვითხრობს. სიუჟეტის ძირითადი ხაზი ნიუ-იორკის კერძო სკოლის ახალი თაობის მოსწავლეებზე იქნება ორიენტირებული, რომელთა ცხოვრებაზეც ამჯერად სოციალურ ქსელებს ექნება დიდი გავლენა.

უკვე ცნობილია ისიც, თუ ვინ შეასრულებს მთავარ როლს ახალ სერიალში: ახალგაზრდა ამერიკელი მსახიობი, ემილი ელინ ლინდი, რომელსაც მანამდე მეორეხარისხოვანი როლები აქვს შესრულებული ისეთ ფილმებში, როგორებიცაა The Babysitter (2017) და Doctor Sleep (2019).

ემილი ელინ ლინდი ფილმში Doctor Sleep.

ფოტო: Warner Bros. Pictures

ასევე ცნობილია კიდევ რამდენიმე ახალი სახე, რომელსაც მომავალ შოუში ვიხილავთ: უიტნი პიკი, ელი ბრაუნი, ჯონათან ფერნანდესი და ჯეისონ გოტეი. დიდი ალბათობით, სერიალის სიქველში კიდევ უფრო მრავალფეროვანი და განსხვავებული პერსონაჟების ცხოვრებას გავეცნობით.

ფოტო: STEVEN TRUMON GRA Y / CHAD WAGNER / ROWAN DALY / TYLER PENGELLY / AWESOMENESS TV

ახალ სერიალს კვლავ მწერალ სესილი ფონ ციგეზარის წიგნის მიხედვით იღებენ: ორიგინალი შოუც სწორედ ამ ავტორის წიგნების სერიის მიხედვითაა შექმნილი.

2007-2012 წლებში ექვსი სეზონის განმავლობაში Gossip Girl-ის 121 ეპიზოდი გამოვიდა, რომელშიც მთავარ როლებს ბლეიკ ლაივლი, ლეიტონ მისტერი, პენ ბეჯლი, ჩეის კროუფორდი, ტეილორ მომსენი, ედ ვესტვიკი, კელი რაზერფორდი და მეთიუ სეტლი ასრულებდნენ.

პრემიერის ზუსტი თარიღი ჯერჯერობით ცნობილი არ არის, თუმცა, სავარაუდოდ, წლის ბოლომდე ამ შოუს ერთგულ გულშემატკივრებს შესაძლებლობა ექნებათ ისტორიის გაგრძელება იხილონ.