One Direction-ის ყოფილი შემსრულებელი ზეინ მალიკი და ამერიკელი სუპერმოდელი ჯიჯი ჰადიდი მშობლები გახდნენ. წყვილის პირველი შვილი გოგოა, მისი დაბადება ჰადიდმა და მალიკმა სოციალურ მედიაში პოსტებით აღნიშნეს.

"ჩვენი გოგონა ამ შაბათ-კვირას მოგვევლინა დედამიწაზე და უკვე შეცვალა ჩვენი სამყარო. უსაზღვროდ შეყვარებული ვარ", — დაწერა ჯიჯიმ.

"ჩვენი პატარა გოგონა აქაა, ჯანმრთელი და მშვენიერი. შეუძლებელია ჩემი გრძნობების სიტყვებით გადმოცემა. სიყვარული, რომელსაც ამ ციცქნა ადამიანის მიმართ ვგრძნობ, ლოგიკის მიღმაა. ამაყი ვარ, რომ მას ჩემი შვილი შემიძლია ვუწოდო და მადლიერი ვარ იმ მომავლისთვის, რომელიც მთელი ცხოვრება წინ გვაქვს", — დაწერა ზეინმა.

ინფორმაცია იმაზე, რომ მოდელი ჯიჯი ჰადიდი და მუსიკოსი ზეინ მალიკი პირველ შვილს ელოდებოდნენ, 28 აპრილს გავრცელდა. წყვილი ერთმანეთს 2015 წლიდან ხვდება, თუმცა ურთიერთობის განმავლობაში ისინი რამდენჯერმე დაშორდნენ. თვითიზოლაციის დღეები მუსიკოსმა და მოდელმა ჰადიდის ფერმაში ერთად გაატარეს და 23 აპრილს ჯიჯის 25 წლის იუბილეც ერთად აღნიშნეს.

წყვილი რამდენჯერმე მოხვდა ჟურნალ Vogue-ს ყდაზე.