მინსკში ალექსანდრ ლუკაშენკოს ინაუგურაცია ჩატარდა, სადაც მან საპრეზიდენტო ფიცი დადო. ინაუგურაცია ისე ჩატარდა, რომ ამის შესახებ არაფერი იყო ცნობილი, ხოლო ინფორმაცია სახელმწიფო გამოცემა Belta-მ გაავრცელა.

როგორც გამოცემა წერს, ღონისძიება დამოუკიდებლობის სასახლეში ჩატარდა, სადაც ასობით ადამიანი იყო მიპატიჟებული. ეს ლუკაშენკოს უკვე მეექვსე ინაუგურაციაა.

ლუკაშენკოს თქმით, პრეზიდენტობას ის სიამაყით უდგება. მისივე თქმით, ეს წელი ბელარუსის ისტორიაში "ძალიან ემოციურ" წლად შევა.

დილიდან სხვადასხვა ბელარუსული ტელეგრამარხი ავრცელებს ინფორმაციას, რომ მინსკის ცენტრალური ქუჩები გადაკეტილია.

ფოტო: Belta

ბელარუსში ჩატარებული საპრეზიდენტო არჩევნების შემდეგ ქვეყანა საპროტესტო აქციებმა მოიცვა. მოქალაქეები ალექსანდრ ლუკაშენკოს კვლავ გაპრეზიდენტებას აპროტესტებენ და არჩევნების თავიდან ჩატარებას მოითხოვენ. არჩევნების შედეგებს არ აღიარებს გაერთიანებული ოპოზიციის კანდიდატი სვეტლანა ტიხანოვსკაია, რომელიც შედეგების გამოცხადების შემდეგ იძულებული იყო, ქვეყანა დაეტოვებინა. მისი ინიციატივით, ძალაუფლების მშვიდობიანი გადაბარებისთვის საკოორდინაციო საბჭო შეიქმნა.

ევროპარლამენტმა ბელარუსში აგვისტოში ჩატარებულ არჩევნებს გაყალბებული უწოდა და არ აღიარა. ევროპარლამენტის თქმით, ლუკაშენკოს 5 ნოემბრიდან, როცა მისი უფლებამოსილების ვადა ამოიწურება, პრეზიდენტად აღარ აღიარებენ. ასევე, ევროკავშირს მოუწოდეს, რომ ლუკაშენკოს ეკონომიკური სანქციები დაეკისროს.