გირჩის ლიდერის, ზურაბ ჯაფარიძის განცხადებით, მიხეილ სააკაშვილს არანაირი საფუძველი არ აქვს, თქვას, რომ თუ ნაციონალურმა მოძრაობამ არჩევნები არ მოიგო, ქვეყანა დაიღუპება. მისივე თქმით, მისი პარტია არ არსებობდა, როცა "ქართველები რაღაცებს ატრაკებდნენ". ამის შესახებ ჯაფარიძემ ფორმულას ეთერში ისაუბრა.

"მისივე კვლევით, მის პარტიას აქვს 15,5%-იანი მხარდაჭერა, ამ პარტიის ლიდერი რომ იძახის, რომ ერთპარტიული მმართველობა უნდა იყოს და ნაციონალურმა მოძრაობამ თუ არ მოიგო, ქვეყანა დაიღუპება, ან ეს რა განცხადებაა. ნაციონალურ მოძრაობას დიდი მადლობა, ძაან კარგი რაღაცები გაკეთდა, მე მათ შორის, მხარდაჭერიც ვიყავი მათი, მარა ძაან დიდი ბოდიში, რა, ნაციონალური მოძრაობა და სააკაშვილი არ არსებობდნენ და აქ, ამ ტერიტორიაზე ქართველები რაღაცებს ვატრაკებდით და კიდევ გავატრაკებთ, არ გადავშენდებით და არ გავქრებით. მას უნდა ძალაუფლების ხელში ჩაგდება ისე, რომ ამის ადეკვატური საფუძველი საზოგადოებაში არ გააჩნია", — განაცხადა ჯაფარიძემ.

20 სექტემბერს, მიხეილ სააკაშვილმა TV პირველის ეთერში განაცხადა, რომ ის მხოლოდ საზოგადოების კოალიციას ხედავს და არ ხედავს პარტიულ კოალიციას. მისი თქმით "პოლიტიკური პარტიების და პარტიუკების" საერთოდ არ სჯერა. სააკაშვილმა, ასევე, აღნიშნა, რომ 2020 წლის საპარლამენტო არჩევნებზე უმრავლესობას ან ნაციონალური მოძრაობა აიღებს ან საქართველო "დაიღუპება". ამასთან, ჟურნალისტის კითხვას: "აქვს თუ არა ამომრჩეველს მხოლოდ ორი არჩევანი, თქვენ ან ბიძინა ივანიშვილი?" ყოფილმა პრეზიდენტმა უპასუხა, რომ ასეა და ეს ყველამ კარგად იცის.

თუმცა სააკაშვილმა ეს მიდგომაც შეცვალა და დღეს ამტკიცებს, რომ ის და მისი პარტია "ინკლუზიური" მთავრობის მომხრე არიან. ეს განცხადება მან მას შემდეგ გაავრცელა, რაც ოპოზიციამ გააკრიტიკა იმის გამო, რომ "კოალიციური" მთავრობა არ სურდა.