სტრატეგია აღმაშენებლის ლიდერი და ისნის მაჟორიტარობის კანდიდატი, გიორგი ვაშაძე აცხადებს, რომ მიხეილ სააკაშვილს "თავგზა აერია" და ხალხთან არასწორ, ცრუ დილემაზე დაიწყო საუბარი, როცა მან კოალიცია გამორიცხა და ისევ პოლარიზაციასა და ორპოლუსიანობაზე გააკეთა აქცენტები. ამის შესახებ მან პალიტრანიუსის გადაცემა Newsroom-ში ისაუბრა.

"ეს არის ძალიან ცრუ დილემა, რომელიც სააკაშვილმა გუშინ წამოაყენა. ძალიან ვწუხვარ, რომ მიშას ასე აერია თავგზა, სამწუხაროა, ეს. პირდაპირ ვამბობ, რომ ნაციონალური მოძრაობის მცდელობა, რომ მეტი მანდატი მიიღოს პარლამენტში, უბრალოდ იმით, რომ დაასუსტოს სხვა ოპოზიციური პარტიები, არის უსუსტესი მცდელობა და ეს არ გაუვა, იმიტომ რომ საზოგადოება არჩევანს აკეთებს წარსულსა და მომავალს შორის", — განაცხადა ვაშაძემ.

საქართველოს ყოფილი პრეზიდენტის, მიხეილ სააკაშვილის განცხადებით, იგი მხოლოდ საზოგადოების კოალიციას ხედავს, ხოლო პარტიულ კოალიციას — არა. ამის შესახებ სააკაშვილმა გუშინ TV პირველის ეთერში ისაუბრა.

თუმცა დღეს სააკაშვილმა გუშინდელი მიდგომა შეცვალა და დღეს ამტკიცებს, რომ ის და მისი პარტია "ინკლუზიური" მთავრობის მომხრე არიან. ეს განცხადება მან მას შემდეგ გაავრცელა, რაც ოპოზიციამ გააკრიტიკა იმის გამო, რომ "კოალიციური" მთავრობა არ სურდა.