ჯერ კიდევ მანამ, სანამ მილიონობით მაყურებელი Game of Thrones-ს დაემშვიდობებოდა, ამ საკულტო შოუს შემოქმედები აქტიურად განიხილავდნენ ხუთი სხვადასხვა სერიალის იდეას, რომელიც იმავე სამყაროში განვითარდებოდა, ოღონდ სულ სხვა დროში და განსხვავებული გმირების ისტორიების მიხედვით შეიქმნებოდა.

ერთ-ერთი ასეთი პრიქველი, რომელსაც სახელწოდებით Bloodmoon ან The Long Night მოიხსენიებდნენ, ჩვენთვის კარგად ნაცნობ ამბებამდე 8 000 წლით ადრე მომხდარ მოვლენებზე მოგვითხრობდა.

შესაბამისად, არათუ ნაცნობ პერსონაჟებს, არამედ დრაკონებს, ტარგარიენებსა და რკინის ტახტსაც კი ვერ ვიხილავდით, თუმცა, დიდი ალბათობით, გამოჩნდნბოდნენ სტარკები, ტყის შვილები და თეთრი მოსიარულეები.

HBO-მ დაიწყო კიდეც ამ პროექტზე მუშაობა: გადაიღეს საპილოტე ეპიზოდი, რომლის აღმასრულებელი პროდიუსერი ყინულისა და ცეცხლის სიმღერის ავტორი, ჯორჯ მარტინი იყო.

საპილოტე ვერსიის ხილვის შემდეგ HBO-მ მასზე მუშაობა შეაჩერა. როგორც ჩანს, GOT-ის ფინალის იმედგაცრუების შემდეგ, ისინი უფრო კრიტიკულად აფასებენ შესაძლო რისკებს.

თუმცა გულს ნუ დაიწყვეტთ: ერთ შესაძლო ვარიანტზე უარის თქმის მიუხედავად, მათ უკან არ დაუხევიათ და ახალი პრიქველის შექმნაზე ორიენტირდნენ, რომლის სახელწოდებაც House of the Dragon იქნება.

ამ ახალი პრიქველის სიუჟეტური ხაზი უფრო ახლო წარსულს უკავშირდება, ვიდრე Bloodmoon-ისა: House of the Dragon ტარგარიენების სამოქალაქო ომის, იგივე დრაკონების ცეკვის შესახებ იქნება, რომელიც Game of Thrones-ში ასახულ ისტორიამდე 200 წლით ადრე მოხდა.

სერიალს კვლავ ჯორჯ მარტინის წიგნების კიდევ ერთი ცნობილი სერიის Fire and Blood-ის მიხედვით იღებენ, რომელიც ტარგარიენების საგვარეულოს წარმომადგენლების ცხოვრების შესახებ მოგვითხრობს.

ეს ომი დეინერისის წინაპრებმა რამდენიმე თაობით ადრე წამოიწყეს და მან საბოლოოდ ვესტეროსის ერთიანი სამეფოს შექმნა გამოიწვია. შესაბამისად, მალე ეკრანზე არაერთ დრაკონსა და მათ მხედრებს — ტარგარიენებს ვიხილავთ.

Game of Thrones-ისგან განსხვავებით, ამ სერიალის სიუჟეტური ხაზის დასასრული ჩვენთვის წინასწარვე ცნობილია, თუ, რა თქმა უნდა, მისი შემქმნელები პირველწყაროს არ გადაუხვევენ, რაც ნაკლებ სავარაუდოა, რადგან ჯორჯ მარტინი კვლავ მთავარი აღმასრულებელი პროდიუსერია.

მარტინთან ერთად ამ შოუს შექმნაში მონაწილეობას მიიღებს მიგელ საპოჩნკი, რომელიც აქამდეც მაყურებლებისთვის არაერთი საყვარელი ეპიზოდის შექმნაში იყო ჩართული: მან გადაიღო ისეთი ცნობილი სერიები, როგორებიცაა Battle of the Bastards, Hardhome და The Winds of Winter.

უკვე დამტკიცებულია, რომ ამ ახალი პროექტისთვის ათ სერიას გადაიღებენ: HBO-მ უკვე კასტინგიც გამოაცხადა. ასევე ცნობილია, რომ მისი პრემიერა 2022 წელსაა დაგეგმილი, თუმცა ეს თარიღი შეიძლება ნებისმიერ დროს შეიცვალოს, განსაკუთრებით მსოფლიოში მძვინვარე პანდემიის გამო.

როგორც ვიცით, ამჟამად GOT-ის სხვა არცერთ პრიქველს აღარ განიხილავენ და მთლიანად House of the Dragon-ზე არიან კონცენტრირებულნი. შესაბამისად, ისღა დაგვრჩენია, დეინერსზე მეტი მოთმინება ვიქონიოთ და ვიმედოვნოთ, რომ ჩვენი საყვარელი სამყაროს შესახებ ახალ სერიალს მალე ვიხილავთ.