პირველი ოქტომბრიდან რიგის მიმართულებით პირდაპირი რეისები დაიწყება და მას WizzAir შეასრულებს. როგორც მთავრობის სხდომაზე პრემიერმინისტრმა, გიორგი გახარიამ თქვა, კვირაში ერთი რეისი შესრულდება.

"ეს არის პირდაპირი ტენდენცია იმისა, რომ ჩვენ გონივრულად, მაგრამ ფრთხილად, ჩვენ ყველაფერი უნდა გავაკეთოთ იმისათვის, რომ ეკონომიკა ამოძრავდეს კიდევ უფრო სწრაფად", — განაცხადა გახარიამ.

მისივე თქმით, ისინი თანმიმდევრულად გააგრძელებენ საქართველოს საჰაერო სივრცის გახსნას.

11 სექტემბერს ცნობილი გახდა, რომ საერთაშორისო რეგულარულ საჰაერო მიმოსვლიაზე დაწესებული შეზღუდვები პირველ ნოემბრამდე გახანგრძლივდა. შეზღუდვა არ ვრცელდება იმ პირდაპირ საერთაშორისო რეისებზე, რომლებიც სრულდება თბილისის საერთაშორისო აეროპორტსა მიუნხენის, პარიზისა და რიგის აეროპორტებს შორს.

kორონავირუსთან დაკავშირებული უწყებათაშორისი საკოორდინაციო საბჭოს გადაწყვეტილებით, 21 მარტიდან საჰაერო მიმოსვლა სრულად შეწყდა. რამდენიმე თვის განმავლობაში ფრენის უფლება მხოლოდ საქართველოს ავიახაზებს ჰქონდა, რომელიც სპეცრეისებს ასრულებდა.

მიუხედავად ამისა, მმართველი გუნდი აცხადებდა, რომ სხვა ქვეყნებთან მოლაპარაკებები გრძელდებოდა და საქართველო იქნებოდა ერთ-ერთი პირველი მწვანე ზონის ქვეყანა, რომელიც საჰაერო საზღვრებს გახსნიდა, ასე არ მოხდა. მთავრობამ გადაწყვიტა, რომ საზღვრების გახსნა პირველი ივლისის ნაცვლად, 31 ივლისამდე გადაედო და ამის მიზეზად ეპიდსიტუაცია და ეკონომიკური ზარალი დაასახელა. ამის შემდეგ, იმავე მიზეზით, ფრენები რამდენჯერმე გადაიდო.

ამ დროისათვის საქართველოდან რეგულარული ფრენები გერმანიასთან, საფრანგეთთან და ლატვიასთან სრულდება. სხვა ქვეყნებთან სრულდება მხოლოდ ჩარტერული რეისები, რომლებსაც ქვეყნებიდან საქართველოს მოქალაქეები ჩამოჰყავს.